Барысаўскі БАТЭ выйшаў у плэй-оф Лігі Еўропы УЕФА, атрымаўшы ўпэўненую перамогу над грэчаскім клубам ПАОК у гасцявым матчы ў Салоніках з лікам 3:1. Увогуле беларускія футбалісты набралі дзевяць ачкоў і завяршылі групавы этап на другім месцы ў квартэце L, саступіўшы першы радок "Чэлсі" (15 ачкоў).
"Перш за ўсё, вядома, мы далучаемся да ўсіх віншаванняў, якія атрымала футбольная каманда БАТЭ, бо яна на вельмі добрай ноце скончыла чэмпіянат з удзелам Еўракубка, і гэта кажа пра тое, што каманда мае характар, неабходны ўзровень майстэрства, ну і супернік вельмі годны быў", - падзяліўся эмоцыямі пасля матчу вядомы беларускі футбаліст і трэнер, варатар мінскага "Дынама" 1982 года, чэмпіён СССР Міхаіл Вяргеенка.
Па словах суразмоўцы Sputnik, цяпер хацелася б, каб тое добрае, што адбылося ў канцы еўрапейскага розыгрышу, перанеслася на будучы год, каб па выніках лёсавання 17 снежня камандзе трапіліся добрыя супернікі, а тая прыступка майстэрства, на якой зараз знаходзіцца БАТЭ, дала магчымасць камандзе падняцца яшчэ вышэй.
Нагадаем, лёсаванне першых матчаў плэй-оф Лігі Еўропы адбудзецца ў бліжэйшы панядзелак у штаб-кватэры УЕФА ў Ньёне (Швейцарыя). У ліку меркаваных супернікаў барысаўчан - дынамаўцы Украіны і Харватыі, расійскі "Зеніт", партугальская "Бенфіка", іспанскія "Валенсія", "Севілья", "Бетис", "Вільярэал", аўстрыйскі "Зальцбург", англійскі "Арсенал", італьянскія "Інтэр", "Напалі", нямецкія "Баер" і "Айнтрахта", бельгійскі "Генк".
Падрабязнасці размовы з Міхаілам Вяргеенкам слухайце на радыё Sputnik Беларусь.