МІНСК, 9 сту - Sputnik. Уручэнне спецыяльнай прэміі "Атлетыка" прайшло ў Мінску, паведамляе прэс-служба Беларускай федэрацыі лёгкай атлетыкі (БФЛА).
Лепшымі прызнаны Вольга Мазуронак (марафон) і Максім Недасека (скачкі ў вышыню).
Акрамя таго, у гэтым годзе ўпершыню адбылося ўручэнне ганаровага знаку БФЛА "За заслугі" - яго ўручылі алімпійскім чэмпіёнкам Таццяне Лядоўскай і Эліне Зверавай.
У намінацыі "Лепшая каманда" перамога дасталася жаночай марафонскай зборнай, якая прадстаўляла Беларусь на Чэмпіянаце Еўропы ў Берліне.
Узнагароды атрымалі таксама лепшыя атлеты і трэнеры ў намінацыях "Юнакі", "Юніёры" і "Моладзь", вызначаны лепшыя суддзі сезона. Акрамя гэтага, уручаны спецыяльныя намінацыі "Прарыў года" (Дзмітрый Набокаў), "Адкрыццё года" (Віталь Жук), "Учынак года" (Аліна Талай) і "Характар года" (Вольга Мазуронак).
Традыцыйна былі названыя тры лепшыя дзіцячыя спартыўныя ўстановы, якім былі ўручаны сертыфікаты на 4000, 3000 і 2000 рублёў у залежнасці ад колькасці медалістаў рэспубліканскіх спартакіяд.
У 2018 годзе беларускія лёгкаатлеты ўстанавілі 27 нацыянальных рэкордаў. З іх 11 - юнакі, 5 - юніёры, 4 - моладзь, 7 - дарослыя.
Прэмія "Атлетыка" ўручаецца ўжо пяты год, усяго ў ёй 13 намінацый.