МІНСК, 14 сту - Sputnik. Пытанне аб абмене кіраўніка партала РІА "Новости Украина" Кірыла Вышынскага на затрыманых у Расіі украінцаў цяпер не абмяркоўваецца, заявіў у інтэрв'ю РІА "Новости" намеснік кіраўніка МЗС Расіі Яўген Іваноў.
Журналіста Вышынскага затрымалі ў Кіеве ў сярэдзіне мая па падазрэнні ў падтрымцы самаабвешчаных ДНР і ЛНР і дзяржаўнай здрадзе. Суд над кіраўніком інфармацыйнага партала пастаянна зацягваецца - у РФ упэўненыя, што прычынай таму стала адсутнасць доказаў.
На пытанне аб тым, ці абмяркоўваецца сёння пытанне аб абмене Вышынскага на затрыманых у Расіі украінцаў, намеснік кіраўніка МЗС адказаў адмоўна.
"На сённяшні дзень такіх абмеркаванняў не было", - заявіў Іваноў.
У той жа час украінскія ўлады адмаўляюць расійскім консульскім работнікам у наведванні журналіста. Нагадаем, пасля затрымання Вышынскі адмовіўся ад украінскага грамадзянства - зараз ён з'яўляецца толькі расійскім грамадзянінам. Аднак Украіна па-ранейшаму не пускае расійскіх дыпламатаў да журналіста.
"Нягледзячы на гэтыя абставіны, нашы консульскія работнікі працягваюць знаходзіцца ў пастаянным кантакце з адвакатамі Вышынскага і робяць усё магчымае для абароны яго правоў і інтарэсаў", - канстатаваў Іваноў.
Прэзідэнт Расіі Уладзімір Пуцін называў беспрэцэдэнтнай сітуацыю вакол арышту журналіста: ён падкрэсліваў, што Вышынскага арыштавалі "за яго прамую прафесійную дзейнасць, за ажыццяўленне яго журналісцкай функцыі". Масква накіравала Кіеву ноты пратэсту з патрабаваньнем спыніць гвалт над прадстаўнікамі прэсы.
Прадстаўнік АБСЕ па пытаннях свабоды СМІ Арлем Дэзір раней выказаў сур'ёзную трывогу ў сувязі з дзеяннямі Кіева ў дачыненні да РІА "Новости Украина". Выказвалі занепакоенасць сітуацыяй і многія іншыя міжнародныя арганізацыі і структуры.