МІНСК, 14 сту - Sputnik. Экіпажы каманды "МАЗ-СПОРТаўта" працягваюць спробы нагнаць упушчаныя пазіцыі ў ралі "Дакар", аднак на шостым этапе беларусаў зноў пераследвалі непрыемнасці.
Болей за ўсё крыўдна 501-му экіпажу: каміён, якім кіруе Сяргей Вязовіч, прыехаў на фініш маршруту першым, аднак у ходзе гонкі ён прапусціў кантрольную кропку, атрымаў гадзінны штраф і адкаціўся на 6-е месца.
"На адным са спускаў мы не ўтрымалі грузавік на трэку і прыйшлося спусціцца ўніз. Наверсе засталася адна з кропак. 20 хвілін мы спрабавалі вярнуцца, бо вельмі высока", - распавядае сам пілот.
Праблемы здарыліся і ў Аляксея Вішнеўскага - незадоўга да фінішу яго МАЗ перавярнуўся, рабят паставіў на колы экіпаж Аляксандра Васілеўскага. Да таго ж пасля падзення ў рухавіку выцекла масла - і прама ў кабіну.
У выніковым заліку Вішнеўскі апусціўся на радок ніжэй і стаў сёмым, прайграючы лідару, Эдуарду Мікалаеву на КаМАЗе, крыху больш за пяць гадзін, Васілеўскі ўтрымлівае дзевятую пазіцыю, а Вязовіч, нягледзячы на штраф, ужо "дыхае ў спіну" першай дзесятцы - сярэбраныя прызёры мінулага года ўжо 11 -е.
У заліку пазадарожнікаў лідар па-ранейшаму катарец Нассер Аль-Ація, да яго з невялікім адставаннем наблізіўся француз Себасцьян Лёб, трэці - яго суайчыннік Стэфан Петэрансель. У заліку матацыклістаў лідары ўсё тыя ж, але яны памяняліся месцамі: першы - чыліец Пэдра Куінтанілья, другі - гоншчык з ЗША Рыкі Брабец, трэці - аўстраліец Тобі Прайс. У квадрацыклістаў тройка лідараў не змянілася.
Сёмы этап гонкі стартуе ў панядзелак і пройдзе ў ваколіцах горада Сан Хуан дэ Маркона.