МІНСК, 11 лют - Sputnik. Цырымонія ўручэння адной з самых прэстыжных музычных прэмій "Грэмі" прайшла ў Лос-Анджэлесе, паведамляе Sputnik.
Упершыню ў гісторыі конкурсу ў намінацыі "Лепшая песня года" перамагла хіп-хоп кампазіцыя - This Is America ў выкананні Childish Gambino. Акрамя таго, яна таксама была адзначана ў катэгорыях "Лепшае музычнае відэа" і "Лепшае рэп/снаг-выкананне".
Пераможцай у намінацыі "Лепшы сольны поп-выступ" стала Лэдзі Гага з песняй Joanne. Спявачка атрымала яшчэ адну ўзнагароду: яе кампазіцыю Shallow, выкананую разам з акцёрам Брэдлі Купера ў меладраме "Зорка нарадзілася", назвалі "Лепшай песняй для візуальных СМІ".
Лепшым вакальным поп-альбомам была прызнаная пласцінка Арыяны Грандэ Sweetener. Дарэчы, спявачка не прыехала на цырымонію ўзнагароджання ў знак пратэсту супраць "дыктатуры" з боку прадзюсара "Грэмі" Кена Эрліка ў выбары песні для выступу.
У катэгорыі "Лепшы традыцыйны вакальны поп-альбом" перамогу атрымаў дыск My Way з хітамі Фрэнка Сінатры ў выкананні кантры-музыкі Вілі Нэльсана.
"Лепшым альбомам альтэрнатыўнай музыкі" стала пласцінка Colors спевака Бэка. У намінацыі "Лепшы рок-альбом" запаветную статуэтку атрымаў дыск From The Fires групы Greta Van Fleet.
Прэмію "Грэмі" за лепшае рок-выкананне пасмяротна атрымаў амерыканскі гітарыст і спявак, лідар гранж-гурта Soundgarden Крыс Корнэл за кампазіцыю When Bad Does Good. Статуэтку перадалі яго дзецям.
У гэтым годзе прэмію "Грэмі" ўручалі ў 61-ы раз. Узнагароды былі прысуджаныя ў 78 намінацыях. Многія вядомыя артысты былі ганараваныя прэміяй за ўсю гісторыю яе існавання. Сярод іх - Элвіс Прэслі, Ціна Цёрнэр, Джон Ленан, Боб Дылан, Уітні Х'юстан, Стынг, Мадонна, Depech Mode.