МІНСК, 14 лют - Sputnik. Прэзідэнт Беларусі Аляксандр Лукашэнка падпісаў Указ №47, які ўнёс змены ва Указ ад 30 верасня 1999 года №573 "Аб Рэспубліканскай дошцы Гонару", паведамілі ў прэс-службе кіраўніка дзяржавы.
Згодна з дакументам, цяпер Рэспубліканская дошка Гонару будзе абнаўляцца кожны год напярэдадні Дня працы, які адзначаецца першага мая.
Акрамя таго, арганізацыі і іх філіялы, якія трапяць на Рэспубліканскую дошку Гонару на працягу двух гадоў запар, не змогуць удзельнічаць у конкурсным адборы ў наступным пасля гэтага перыяду годзе.
Удасканалены таксама механізм конкурснага адбору кандыдатаў на занясенне на дошку Гонару на ўзроўні аблвыканкамаў і Мінскага гарвыканкама.
Таксама ўказам уведзены два месцы для арганізацый сацыяльнага абслугоўвання, якія пакажуць найлепшыя вынікі працы за справаздачны год.
Паведамляецца, што публічнае прызнанне грамадскай значнасці дзейнасці такіх арганізацый павінна паслужыць стымулам для паляпшэння і павышэння эфектыўнасці іх работы.
Указ накіраваны на стымуляванне рэгіёнаў, арганізацый, работнікаў беларускіх прадпрыемстваў да павышэння эфектыўнасці вытворчасці, павелічэння выпуску канкурэнтаздольнай прадукцыі, эканоміі рэсурсаў.