Карэспандэнт Sputnik Леў Рыжкоў за кулісамі праекта пагутарыў з Дашай, даведаўся, як жыве і чым займаецца фіналістка першага сезона.
Міжнародны праект "Ты супер!" дапамагае знайсці сябе юным талентам, якія засталіся без апекі бацькоў. Пасля праекта многія дзеці вырашылі стаць прафесійнымі артыстамі, пайшлі вучыцца ў музычныя каледжы і вучылішча. Праект створаны тэлекампаніяй НТБ і міжнародным інфармацыйным агенцтвам і радыё Sputnik.
Прывітанне, дарослае жыццё!
Міжнародны праект "Ты супер!" дапамагае знайсці сябе юным талентам, якія засталіся без апекі бацькоў. Стваральнікі праекта вырашылі адысці ад стандартных правілаў і запрасілі ў суперсезон дзяцей з мінулых сезонаў. Так што на дваццаць аднаго новенькага даводзіцца трыццаць шэсьць "старэнькіх".
Даша Чарнова, можна сказаць, ветэран праекта. На падмаскоўнай базе адпачынку, дзе пасяліліся ўдзельнікі праекта, Даша адчувае сябе вельмі камфортна - гэта бачна. Шкадуе яна толькі пра тое, што не можа бесклапотна, як іншыя ўдзельнікі, рыхтавацца да конкурсу. Дома ў Дашы неадкладныя справы, таму фіналістцы першага сезону прыйдзецца жыць на два гарады - Мінск і Маскву.
"Я вярнулася на праект, - кажа Даша. - Вярнулася да сяброў і выдатнай атмасферы, у якой нараджаюцца мары. Кожны дзень тут - гэта проста палёт у свае жаданні. Таму вялікая радасць - вяртацца сюды зноў і зноў. Калі толькі даецца такая магчымасць - я адразу тут".
Фіналістка першага сезона - дзяўчынка з усмешкай і узрушаючым пачуццём гумару. На праект яна прыехала зусім не перамагаць.
"Я ніколі не бралася за нешта, толькі каб атрымаць верх, - кажа Даша. - Для мяне вельмі важна адкрываць для сябе нешта, падымацца на новую вяршыню. Але гэта не значыць, што для гэтага мне трэба абыйсці кагосьці. Я не з тых людзей, якія любяць ісці на канфлікт ці неяк размяжоўваць тэрыторыю".
Зоркай сябе Даша Чарнова не лічыць.
"Я б не сказала, што мяне ўсё пазнаюць на вуліцах, таму што са сваім рытмам я асабліва на вуліцы і не гуляю, - распавядае Даша. - Я дзяўчынка ўжо дарослая. У мяне ёсць цікавая праца і практычна няма вольнага часу. І калі я дзесьці перасоўваюся - то ў вялікай спешцы, асабліва не адцягваючыся ні на што старонняе. Тым не менш для супрацоўніцтва я заўсёды адкрыта. Асабліва ў дабрачынных праектах. А стаць суперзоркай я ніколі не імкнулася".
На праект - за перазагрузкай
Вядома, вельмі цікава, кім працуе Даша і ці звязана гэтая праца з творчасцю.
"Праца ў мяне вельмі цікавая, - кажа фіналістка першага сезона. - Я пачала працаваць ужо больш за паўгода таму. Спачатку я прыйшла ў караоке-клуб як бэк-вакалістка, потым стала арт-дырэктарам. Зараз я прымаю непасрэдны ўдзел у арганізацыі мерапрыемстваў. І збіраюся таксама выходзіць на сцэну, працаваць там. Увогуле, праца цяжкая, але вельмі цікавая і разнастайная. Яна мне вельмі падабаецца".
Што ж у такім выпадку прывяло Дашу - прафесіянала - на суперсезон праекта "Ты супер!"?
"Праект для мяне - у першую чаргу глабальная перазагрузка, - кажа Дар'я Чарнова. - Такіх момантаў у жыцці, напэўна, бывае няшмат. Але дзякуючы таму, што ў маё жыццё увайшоў першы праект, у мяне з'явіліся мэты, жаданні, унутраны стрыжань. Я захацела змагацца, даказваць, нешта рабіць. Увогуле, проста расквітнела. Проста зразумела, што я - на сваім месцы. Было страшна. Але ж зараз жа шчаслівая? Значыць, усё класна".
Вядома, у Дашы Чарновай ёсць мара. Але Даша зусім не хоча для сябе зорнага статусу. Усё значна цікавей.
"У мяне мара - вельмі даўняя, - кажа фіналістка першага сезона. - Мне ўжо даўно хацелася арганізаваць творчую школу для таленавітых дзяцей. І каб выкладалі не толькі вакал і харэаграфію, але і журналістыку, і акцёрскае майстэрства. Калісьці я была дзіцем, якое мела патрэбу ў дапамозе. І я разумею, як гэта важна. Сумна, калі ты маеш талент і не можаш яго раскрыць, таму што ў цябе няма матэрыяльнай магчымасці. Я лічу, што так не павінна быць. І я хачу, каб таленавітыя дзеці атрымлівалі тое, што павінны атрымаць. Я хачу, каб яны бралі ад жыцця ўсё. Таму я планую займацца дабрачыннасцю".