МІНСК, 19 сак - Sputnik. Беларускі прэзідэнт Аляксандр Лукашэнка падпісаў указ, якім усталёўваюцца новыя межы трох абласцей - Мінскай, Гродзенскай і Брэсцкай, паведамілі ў панядзелак у прэс-службе кіраўніка дзяржавы.
Гэты крок быў зроблены ў сувязі з тым, што межы дадзеных абласцей былі вызначаныя ў 1950-х на аснове існуючага на той час незакончанага картаграфічнага матэрыялу.
"З цягам часу з-за меліярацыйных і іншых работ, будаўніцтва аб'ектаў транспартнай інфраструктуры межы перасталі супадаць з цвёрдымі контурамі мясцовасці - рэкамі, меліярацыйнымі каналамі, дарожнай сеткай, ляснымі масівамі, прасекамі і іншымі", - сказалі ў прэс-службе.
Там таксама ўдакладнілі, што згодна з дакументам новыя межы Міншчыны і Гродзеншчыны пачнуць прымяняцца з 1 снежня бягучага года, Брэстчыны - пасля завяршэння дэмаркацыі беларуска-ўкраінскага мяжы.
Пасля гэтага адпаведныя змены будуць унесены ў Дзяржрэестр - адзіны рэгістр нерухомай маёмасці, правоў на яе і здзелак з ёй і Рэестр адрасоў.
Пры гэтым прадугледжана, што за выдачу дакументаў на зямельныя ўчасткі пошліна збірацца не будзе, а плата за іх дзяржрэгістрацыю і ўнясенне выпраўленняў у дакументы рэгістра нерухомасці будзе разлічвацца з паніжальнымі каэфіцыентамі.
У выпадку змены адрасу грамадзяне, ІП і юрыдычныя асобы плаціць за ўнясенне змяненняў у адпаведныя дакументы не будуць, а дамовы арэнды ўчасткаў, межы якіх змяніліся, працягнуць дзейнічаць да названага ў іх тэрміну.