МІНСК, 21 сак - Sputnik. Аранжавы ўзровень небяспекі аб'яўлены ў Беларусі на 22 сакавіка з-за моцнага ветру, паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя ў чацвер.
"22 сакавіка (у пятніцу) раніцай і днём у многіх раёнах рэспублікі і ў Мінску чакаецца ўзмацненне паўночна-заходняга ветру", - папярэдзілі сіноптыкі.
Адзначаецца, што вецер узмоцніцца амаль па ўсёй краіне: у прыватнасці, у Мінскай, Віцебскай, Магілёўскай і Гомельскай абласцях яго парывы будуць дасягаць 15-20 метраў у секунду, а ў Брэсцкай і Гродзенскай - 15-18 метраў у секунду.
Надвор'е ў Беларусі ў гэты дзень будзе няўстойлівае: ноччу на яго паўплывае атмасферны фронт, а ўжо днём - вобласць павышанага атмасфернага ціску. У ранішнія гадзіны па рэспубліцы пройдуць кароткачасовыя дажджы, у дзённыя гадзіны іх пераважна не будзе. Тэмпература паветра складзе ад +1 да +7°С ноччу, а днём падымецца да +6..+11°С (і да +13°С на паўднёвым захадзе).
Пры дзеючым штармавым папярэджанні ратавальнікі заклікаюць беларусаў быць пільнымі і асцярожнымі, улічваць умовы надвор'я пры планаванні паездак, а таксама па магчымасці не знаходзіцца паблізу хісткіх і дрэнна замацаваных канструкцый.