МІНСК, 15 кра - Sputnik. Сяргей Вязовіч за рулём капотнага МАЗа выйграў другі этап ралі Morocco Desert Race ў грузавым заліку, паведамілі Sputnik у прэс-службе каманды "МАЗ-СПОРТаўта".
Другі этап, пракладзены па пяшчаніках пустыні Сахара, экіпаж Вязовіча пераадолеў за 4 гадзіны і 16 хвілін, паказаўшы лепшы вынік сярод каміёнаў, аднак на беларусаў быў накладзены дзесяціхвілінны штраф - яны праехалі не ўсе кантрольныя кропкі. У выніку на першае месца падняўся галандзец Роланд Фоерман (MAN) - які падчас этапу саступіў беларусам дзевяць хвілін.
"Прыехалі першымі, аднак, як аказалася, на трасе не даехалі пару дзесяткаў метраў да схаваных кропак - мы іх проста не ўбачылі, за што атрымалі па пяць хвілін штрафу за кожную з іх", - распавёў Вязовіч.
Трэцяе месца - у экіпажа Аляксея Вішнеўскага. Пасля правальнага пралогу, дзе многія ўдзельнікі атрымалі штрафы з-за шматлікіх памылак, беларусы ўпэўнена набліжаюцца да лідараў гонкі.
Што тычыцца "гоначнага хрышчэння" капотнага МАЗа, то Вязовіч адзначае, што экіпаж задаволены паводзінамі машыны.
Ралі-рэйд Morocco Desert Challenge праходзіць з 12 па 20 красавіка на тэрыторыі Марока. Гоншчыкам адведзены 2741 кіламетр, маршрут падзелены на восем этапаў.