МІНСК, 15 мая - Sputnik. Традыцыйным канцэртам адзначыць гурт Neuro Dubel дзень нараджэння стваральніка і вакаліста гурта Аляксандра Кулінковіча. Як распавяла Алена Кулінковіч на прэс-канферэнцыі ў мультымедыйным прэс-цэнтры Sputnik, падчас вялікага трохгадзіннага канцэрта будзе выканана больш за 30 песень.
Граць канцэрты на дзень нараджэння стваральніка гурта - традыцыя, якая зарадзілася яшчэ калі Аляксандр Кулінковіч быў жывы. Яе сябры і блізкія музыкі вырашылі захаваць і працягнуць.
Грандыёзны выступ гурта разам з вакалістам Юрыем Навумавым і запрошанымі музыкамі пройдзе на сцэне сталічнага клуба Re: Public 18 мая - у дзень, калі Кулінковічу споўнілася б 47 гадоў.
Разам з Neuro Dubel будуць граць и спяваць Ігар Варашкевіч ("Крама"), Зміцер Дольнік (The UNB), Аляксандр Памідораў, Алесь Лютыч (B:N:), Алесь Таболіч (Znich), Зоя Сахончык, Lesley Knife (Gods Tower), Дзяніс Тарасенка (РСП) і іншыя.
Сэт-ліст канцэрту арганізатары пакуль трымаюць у сакрэце. Вядома толькі, што прагучаць культавыя песні "Можна жыць", "Паляўнічы і сайгак", "Гузік", "Час развітацца", "На Марс" і многія іншыя.
"Праграма будзе адрознівацца ад таго, што было на восеньскім дабрачынным канцэрце памяці Аляксандра Кулінковіча", - падкрэсліў адзін з вакалістаў-удзельнікаў Аляксандр Памідораў.
"Калектыў павінен жыць"
У гэтым годзе гурт Neuro Dubel рыхтуецца адзначыць 30-годдзе. Знакавую дату калектыў плануе адзначаць яшчэ адным канцэртам. Канкрэтная дата пакуль невядомая, па словах удзельнікаў ён пройдзе "бліжэй да восені".
"Калектыў не павінен памерці і галоўная прычына - гэта вялікая колькасць матэрыялу, якое сабрана за гэтыя гады. Па-мойму, гэта каля 16 альбомаў і больш за 400 песень. Трэба працягваць гэтую справу любой цаной", - заўважыў нязменны барабаншчык гурта Neuro Dubel Андрэй Сцепанюк.
Па словах Алены Кулінковіч, у апошні час частка сустракаюцца каментары ў сацыяльных сетках аб тым, што канцэрты памяці Аляксандра - своеасаблівыя "скокі на касцях".
"Такія рэчы вельмі крыўдна чытаць, бо гэтыя канцэрты патрэбныя, каб людзі памяталі. Акрамя таго, дзецям вельмі хочацца працягваць гэтую справу", - падкрэсліла яна.
Грошы, атрыманыя на кастрычніцкім канцэрце, пайшлі на стварэнне помніка па аўтарскім праекце на магіле Кулінковіча. Майскі канцэрт не будзе дабрачынным, але частка грошай пойдзе на рэалізацыю яшчэ некалькіх ідэй. У сяброў і блізкіх ёсць планы па выпуску кнігі, фотаальбома і трыб'юта памяці Аляксандра Кулінковіча.
"Саша не хацеў, каб усё скончылася. Ён хацеў, каб яго песні спявалі ў дварах, дома, на канцэртах, каб яго музыка жыла. Будзе няправільна, калі мы зараз забудземся на ўсё гэта", - дадала Алена.