МІНСК, 19 мая - Sputnik. У бягучыя і наступныя суткі істотных ападкаў у Беларусі не чакаецца, пра гэта паведамілі ў рэспубліканскім гідраметцэнтры.
"19-20 мая (у нядзелю і панядзелак) вялікая частка рэспублікі застанецца ў полі павышанага атмасфернага ціску, сфармаваным у цёплай паветранай масе, толькі ў паўднёва-заходніх раёнах захаваецца ўплыў маларухомай франтальнай сістэмы", - перадаюць сіноптыкі.
Па дадзеных спецыялістаў, у нядзелю 19 мая будзе пераважна без ападкаў, кароткачасовыя дажджы і навальніцы могуць прайсці толькі месцамі на паўднёвым захадзе Беларусі.
Мінімальная тэмпература паветра гэтай ноччу ў межах ад +6°С па паўночным усходзе да +16°С па паўднёвым захадзе краіны, а днём пацяплее максімум да +21..+26°С.
У пачатку будучага працоўнага тыдня істотных зменаў надвор'я не будзе: ў панядзелак 20 мая таксама будзе пераважна без ападкаў, аднак у дзённыя гадзіны ў асобных раёнах Беларусі будзе дзьмуць моцны парывісты вецер. Уначы будзе ад +8°С па паўночным усходзе да +16°С па паўднёвым захадзе, а пасля абеду - да +21..+26°С.