Шэдэўр на рэканструкцыі: як зараз выглядае сядзіба Умястоўскіх у Жамыслаўлі

Помнік палацава-паркавай архітэктуры XIX стагоддзя - сядзіба шляхецкага роду Умястоўскіх - знаходзіцца ў аграгарадку Жамыслаўль на Гарадзеншчыне.

Сядзібу ў стылі неакласіцызму будавалі 72 гады прадстаўнікі трох пакаленняў знакамітага шляхецкага роду.

У міжваенныя часы ў сядзібе знаходзілася навуковая база Віленскага ўніверсітэта, потым – санаторый для параненых салдат і афіцэраў кайзераўскай арміі, а у савецкія гады – кіраўніцтва саўхоза. На пачатку 2000-ых тут працавалі калгасная кантора, бібліятэка, клуб, але, калі арганізацыі пераехалі, будынак паступова пачаў сыходзіць у заняпад.

Сядзіба доўгі час знаходзілася ў аварыйным стане, хаця і была ўключана ў спіс гісторыка-культурных каштоўнасцяў Беларусі. У 2012 годзе тут адбыўся пажар, у 2015 годзе комплекс набыў бізнесовец з Іарданіі: ён заплаціў задатак, але хутка знік і не займаўся рэканстркцыяй.

У жніўні 2017 года будынак набыў беларускі бізнесовец. Апошнія паўтара гады ўласнік займаўся дакументацыяй, рыхтаваў будаўнічыя матэрыялы і чысціў парк побач з палацам. Нядаўна пачаліся аварыйна-аднаўленчыя работы.

Паступова будынак набывае новы выгляд.

У надзеі на добрую будучыню мясцовыя жыхары арганізавалі каля палаца шляхецкі фэст "Жамчужная зорка - палац Умястоўскіх".

Сабралася шмат гасцей, не толькі мясцовых жыхароў, але і проста людзей неабыякавых да гэтага краю.

Свята пачалося з тэатралізаванага шэсця з удзелам самаго ўладара зямель Жамыслаўскіх графа Уладзіслава Умястоўскага і яго жонкі Яніны, княгіні Евы, заснавальніцы і ўладаркі зямель іўеўскіх з князям Гэдымінам; князёўны Барбары Радзівіл з Геранёнаў, князя Трабуса з Трабаў.

Госці танчылі і спявалі, каля сядзібы працаваў кірмаш народных вырабаў і праходзілі адмысловыя майстар-класы.

Мясцовыя ўлады плануюць зрабіць фэст брэндам Іўеўскага раёна і сядзібы Умястоўскіх.