ВІЦЕБСК, 24 чэр - Sputnik. Пасля правядзення "Славянскага базару" раку Віцьбу плануюць пачысціць, да такога рашэння камунальныя службы падштурхнуў масавы мор рыбы, які адбыўся ў Віцебску.
У гэтыя выходныя на рацэ Віцьба, якая праходзіць праз цэнтр горада, загінула шмат рыбы. Мяркуецца, што прычынай паслужыла моцная спякота, але для таго, каб выключыць іншыя версіі гібелі прэснаводных, прадстаўнікі Віцебскай гарадской інспекцыі прыродных рэсурсаў і аховы навакольнага асяроддзя накіравалі заяву ў міліцыю.
"На ўчастку прыкладна ў 600 метраў ад моста Баўмана - плыткаводдзе, вада з-за спякоты там моцна прагрэлася, і ў ёй пачала гніць расліннасць. У выніку гніення ўзровень кіслароду ў вадзе быў у пяць разоў ніжэй за норму, неабходную для дыхання рыбы", - патлумачыў сітуацыю начальнік Віцебскай гарадской інспекцыі прыродных рэсурсаў і аховы навакольнага асяроддзя Валерый Фандо.
Па словах суразмоўцы, сітуацыя ўскладнілася яшчэ і тым, што за горадам Віцьба перасохла, у раку амаль не паступае новая вада, і яна фактычна ператварылася ў стаялы вадаём.
"Віцьбе няма адкуль прамывацца свежай вадой, тут па калена буза, а зверху ўсяго сантыметраў 20-25 вады", - дадаў Фандо.
Каб пазбегнуць паморку насельнікаў ракі ў будучыні, пасля правядзення "Славянскага базару" Віцьбу плануюць пачысціць.
Ва УУС Віцебскага аблвыканкама ў сваю чаргу адзначылі, што па факце заявы аб масавым моры рыбы Кастрычніцкім РАУС Віцебска праводзіцца праверка, але яна можа заняць вызначаны час.