МІНСК, 19 ліп - Sputnik. Кіраўніку партала РІА "Новости Украина" Кірылу Вышынскаму не змянілі меру стрымання, адпаведнае рашэнне прыняў Падольскі суд Кіева.
Вышынскі быў узяты пад варту ў Кіеве 15 мая 2018 года. Журналісту аб'явілі, што ён падазраецца ў падтрымцы самаабвешчаных рэспублік Данбаса і дзяржздрадзе. Максімальнае пакаранне па гэтым артыкуле прадугледжвае да 15 гадоў пазбаўлення волі. Чарговы разгляд пытання па меры стрымання для журналіста быў запланаваны на панядзелак, аднак яго вырашылі перанесці на 19 ліпеня.
Пасля разгляду пытання аб меры стрымання для журналіста суд вырашыў працягнуць арышт журналісту да 19 верасня.
Абвінавачванне, матывуючы запыт на падаўжэнне арышту, казала пра тое, што Вышынскі "можа хавацца" ад следства. Пры гэтым сам журналіст заяўляў, што не збіраецца ўцякаць і хоча справядлівасці. Вышынскі прасіў вызваліць яго пад асабістае абавязацельства.
Выказаўся Вышынскі і пра перспектыву абмену. Нагадаем, напярэдадні прэзідэнт Украіны Зяленскі прапанаваў абмяняць Вышынскага на Алега Сянцова. Журналіст выступіў супраць падобнай ідэі.
Раней да прэзідэнта Зяленскага з нагоды справы Вышынскага звярнуўся яго адвакат Андрэй Даманскі: ён заклікаў кіраўніка дзяржавы не дапусціць правакацый падчас судовага паседжання. Звяртаўся з просьбай забяспечыць парадак ён і да кіраўніка МУС Арсена Авакава.
Прадстаўнік АБСЕ па пытаннях свабоды СМІ Арлем Дэзір выказваў сур'ёзную трывогу ў сувязі з дзеяннямі Кіева ў дачыненні да РІА "Новости Украина". Пасля чарговага падаўжэння тэрміна ўтрымання Вышынскага пад вартай Дэзір выказаў расчараванне ў сувязі з пазіцыяй Украіны і заклікаў вызваліць журналіста.
Генеральны сакратар АБСЕ Томас Грэмінгер, каментуючы сітуацыю з Вышынскім, падкрэсліў, што ўсе краіны арганізацыі абавязаліся садзейнічаць стварэнню ўмоў, у рамках якіх журналісты могуць выконваць свае абавязацельствы ў іншай дзяржаве-ўдзельніку, і таму павінны выконваць міжнародныя стандарты і не ўмешвацца ў працу СМІ.