МІНСК, 23 ліп - Sputnik. Міністр замежных спраў Беларусі Уладзімір Макей правёў у аўторак сустрэчу з Надзвычайным і Паўнамоцным паслом Федэратыўнай Рэспублікі Германія Манфрэдам Хутэрэрам, пра гэта распавялі ў прэс-службе МЗС.
Сустрэча міністра і дыпламата прайшла з нагоды ўручэння ім копій даверчых грамат. Макей павіншаваў Хутэрэра з прызначэннем і выказаў надзею на далейшы прагрэс актыўнага двухбаковага дыялогу паміж Беларуссю і Германіяй на ўсіх узроўнях. Кіраўнік МЗС таксама запэўніў пасла, што беларускі бок падтрымлівае развіццё ўзаемавыгадных ініцыятыў у розных сферах.
Таксама Уладзімір Макей і Манфрэд Хутэрэр абмеркавалі стан і перспектывы беларуска-нямецкага супрацоўніцтва, у тым ліку ў гандлёва-эканамічнай і інвестыцыйнай сферах. Тэмай для размовы стала таксама ўзаемадзеянне паміж Беларуссю і ЕС і пытанні рэгіянальнага парадку дня.
На днях былы міністр абароны Германіі Урсула фон дэр Ляен была абраная на пасаду старшыні Еўрапейскай камісіі. Прэзідэнт Беларусі Аляксандр Лукашэнка павіншаваў палітыка з гэтай падзеяй і адзначыў, што ён разлічвае на паглыбленне палітычнага дыялогу паміж Беларуссю і ЕС, а таксама на пашырэнне супрацоўніцтва ў шэрагу сфер, у тым ліку ў інвестыцыйнай і гандлёвай дзейнасці, гуманітарнай галіне.