МІНСК, 25 ліп - Sputnik. Для тых, хто адслужыў у войску, плануецца значна пашырыць ільготы пры паступленні ў ВНУ, паведаміў міністр адукацыі Беларусі Ігар Карпенка.
Ён адзначыў, што пэўныя льготы для тых, хто прайшлі вайсковую службу ў нашай сістэме вышэйшай адукацыі ўжо існуюць, але рыхтуецца ўказ, які зацвердзіць правілы прыёму ў новай рэдакцыі.
Плануецца пашырыць пералік ВНУ, куды змогуць паступіць па-за конкурсам зволненыя ў запас пры наяўнасці патрэбных рэкамендацый. Цяпер такая практыка існуе толькі ў дачыненні да ВНУ Мінабароны, сілавых ведамстваў і ваенных факультэтаў.
Калі перад службай у войску была атрымана прафесійна-тэхнічная адукацыя, то па звальненні ў запас малады чалавек зможа паступаць па-за конкурсам на завочнае аддзяленне па профілі сваёй спецыяльнасці.
Карпенка таксама адзначыў, што па прапанове Міністэрства адукацыі будуць унесены змены ў Жыллёвы кодэкс - правы на інтэрнат для тых, хто навучаецца ў ВНУ і ССНУ, якія прайшлі службу ва Узброеных Сілах, будуць падавацца ў першачарговым парадку.
Прэзідэнт Беларусі Аляксандр Лукашэнка падпісаў у сераду закон "Аб змяненні законаў па пытаннях эфектыўнага функцыянавання ваеннай арганізацыі дзяржавы", так званы закон "Аб адтэрміноўцы", у адпаведнасці з якім ваеннаабавязанаму грамадзяніну будзе прадастаўляцца толькі адна адтэрміноўка для атрымання адукацыі.