МІНСК, 7 жні - Sputnik. Колькасць кляшчоў у Мінску знізілася ў 2,4 разы, а колькасць зваротаў у арганізацыі аховы здароўя з-за прысмоктвання гэтых насякомых засталася на ўзроўні мінулага года, паведамілі ў санітарна-эпідэміялагічнай службе Мінска.
"Па выніках энтамалагічнага маніторынгу ў горадзе Мінску за 7 месяцаў 2019 года колькасць іксодавых кляшчоў знізілася ў параўнанні з аналагічным перыядам мінулага года ў 2,4 разы", - паведамілі ў службе.
Кляшчоў стала менш дзякуючы таму, што спецыялісты правялі неабходны комплекс санітарна-супрацьэпідэмічных мерапрыемстваў, растлумачылі там.
У першую чаргу, спецыялісты паспрабавалі не дапусціць стварэння месцаў пражывання для кляшчоў. Сярод мерапрыемстваў, якія ў гэтым дапамагаюць, не толькі супрацькляшчовая апрацоўка, але і звычайны пакос травы і ўборка павалу. Усяго спецыялісты апрацавалі больш за 300 гектараў тэрыторыі.
Акрамя таго, яны абследавалі рэкрэацыйныя зоны - паркі, скверы, дзіцячыя летнія аздараўленчыя ўстановы, прыгарадныя зоны масавага адпачынку людзей. Цяпер дадзеныя абследаванні тэрыторыі паказваюць, што кляшчы жывуць галоўным чынам у лясных масівах на перыферыі сталіцы.
Супрацоўнікі службы нагадалі, што, збіраючыся ў лес, трэба надзець максімальна закрытую вопратку, скарыстацца адмысловымі сродкамі, якія адпужваюць кляшчоў, а таксама не забываць аглядаць вопратку і адкрытыя ўчасткі цела па вяртанні.
"А ў выпадку прысмоктвання кляшча як мага хутчэй звярніцеся да ўрача, з мэтай прызначэння эфектыўнага прафілактычнага лячэння ў першыя 72 гадзіны", - нагадалі спецыялісты.
Больш чым у 97% выпадкаў хвароба Лайма, якая перадаецца праз укус кляшча, развіваецца ў тых, хто праігнараваў антыбіётыкапрафілактыку, паказаную пасля ўкусу.