МІНСК, 11 вер - Sputnik. Алімпійскі чэмпіён Антон Кушнір завяршыў кар'еру і стаў трэнерам каманды Казахстана, паведамілі Sputnik у сераду ў прэс-службе Нацыянальнага алімпійскага камітэта Беларусі.
Інфармацыя аб завяршэнні фрыстайлістам кар'еры з'явілася раней у сераду ў шэрагу казахстанскіх выданняў. Пазней гэтыя дадзеныя пацвердзілі ў НАК Беларусі.
"Уладальнік залатога медаля зімовых Гульняў 2014 года ў лыжнай акрабатыцы (фрыстайл) беларус Антон Кушнір завяршыў кар'еру і выступіць трэнерам-кансультантам зборнай Казахстана на будучы сезон", - паведамілі ў НАК.
Паводле звестак Беларускай федэрацыі фрыстайлу, кантракт Кушніра з нацыянальнай камандай скончыўся 31 жніўня. Пасля гэтага спартсмен пацвердзіў свой намер дапамагчы фрыстайлістам Казахстана.
Кушнір - заслужаны майстар спорту Беларусі, алімпійскі чэмпіён 2014 года, уладальнік Кубка свету сезона-2009/2010, срэбны прызёр агульнага заліку Кубка свету-2007/2008, бронзавы прызёр чэмпіянату свету 2011 года.
Адным з апошніх залатых медалёў Кушніра стала золата ў сінхронных скачках на этапе Кубка свету ў Раўбічах у канцы лютага гэтага года. Узнагароду ён падзяліў з Арцёмам Башлаковым.