МІНСК, 26 ліс - Sputnik. Прэзідэнт Беларусі Аляксандр Лукашэнка растлумачыў, чаму па выніках парламенцкіх выбараў у склад Палаты прадстаўнікоў Нацыянальнага сходу не патрапілі прадстаўнікі апазіцыі.
Тэма выбараў была закранутая падчас размовы кіраўніка дзяржавы з дэлегацыяй з Калінінграда. Адказваючы на віншаванне пасла РФ Дзмітрыя Мезенцава з паспяхова праведзенай парламенцкай выбарчай кампаніяй, Лукашэнка адзначыў, што не ўсе падзяляюць гэта меркаванне - па яго словах, кіраўнікі МЗС Швецыі і Фінляндыі раней у панядзелак зрабілі заўвагі па выніках выбараў.
"Вы так думаеце. А вось яны (міністры замежных спраў Швецыі і Фінляндыі - Sputnik) пачалі казаць: "Чаму няма празаходніх апазыцыянэраў? У мінулым былі тры чалавекі, а ў гэтым ніводнага". Не ва мне прычына. Калі людзі не падтрымліваюць, што я магу зрабіць?" - выказаўся прэзідэнт, сюжэт з фрагментам гутаркі паказалі ў эфіры тэлеканала АНТ.
Распавёў Лукашэнка і пра тое, што адказаў еўрапейскім дыпламатам: ён заклікаў іх не даваць грошы беларускай апазіцыі.
"Яны даюць грошы, тыя купляюць аўтамабілі, будуюць асабнякі. Грошы немалыя ідуць. Мы іх усе бачым. Тое, што не бачым мы, нам расіяне падкажуць, адкуль яны ідуць. Звычайна праз Літву, Польшчу. Амерыканцы, немцы фінансуюць. Добра яны жывуць. На чорта ім гэтая ўлада, галаўны боль?" - дадаў прэзідэнт.
Парламенцкія выбары адбыліся ў Беларусі 17 лістапада. Новы склад Палаты прадстаўнікоў прыступіць да працы ўжо 6 снежня.