МІНСК, 10 сне - Sputnik. Прэпараты з патэнцыйна небяспечным рэчывам раніцідзінам выключаныя з беларускіх аптэк, паведамляе Sputnik.
Пытанні да раніцідзіна - папулярных лекаў ад пякоткі - з'явіліся ў пачатку восені пасля таго, як у ім быў знойдзены канцараген. Прэпараты з гэтым рэчывам былі адкліканы ў многіх краінах свету.
Вырашылі выключыць з рынку таблеткі з раніцідзінам і ў Беларусі. Яшчэ ўвосень з продажу адклікалі польскія прэпараты - гэта зрабіў сам вытворца.
Цяпер жа па рашэнні ўладаў адкліканы таблеткі расійскай вытворчасці. Аб такім кроку Цэнтр экспертыз і выпрабаванняў у ахове здароўя паведамляў на мінулым тыдні, а самі рашэнні былі апублікаваныя на сайце Міністэрства аховы здароўя напярэдадні.
На сёння ў продажы ў беларускіх аптэках не засталося таблетак з раніцідзінам.
Пацыентам, якія прымалі гэтыя лекі, раяць звярнуцца да ўрача для падбору альтэрнатыўнага лячэння.