МІНСК, 31 сту - Sputnik. Нявырашаныя пытанні ва ўзаемаадносінах Масквы і Мінска абмеркавалі ў пятніцу ў Алматы прэм'ер-міністры Беларусі і Расіі Сяргей Румас і Міхаіл Мішусцін, паведамілі ў прэс-службе Савета міністраў Беларусі.
"Мы прайшліся па ўсіх пытаннях, якія сёння ёсць нявырашаныя ў нашым двухбаковым парадку дня. Гэта цэлы шэраг пытанняў, якія тычацца ўвядзення РФ маркіроўкі, гэта і пытанні ўзаемадзеяння з РФ па ўступленні Беларусі ў СГА, гэта, вядома ж, энергетычныя пытанні, якія сёння у першую чаргу стаяць у беларускім парадку дня", - сказаў Румас журналістам па выніках сустрэчы.
Паводле яго слоў, дасягнута дамоўленасць аб правядзенні ў бліжэйшы час у Маскве паўнавартаснай двухбаковай сустрэчы на ўзроўні ўрадаў для вырашэння пытанняў, што накапіліся.
"Мы аддалі адпаведныя даручэнні нашым міністрам для таго, каб яны падрыхтавалі гэтую сустрэчу, і ў бліжэйшы час мы маглі сустрэцца са старшынёй расійскага ўрада і прайсці па ўсіх пытаннях, якія стаяць на парадку дня", - сказаў Румас.
Сустрэча Румаса з Мішусціным стала першай пасля ўступлення расійскага прэм'ера ў пасаду кіраўніка ўрада. Паводле слоў беларускага прэм'ера, ён меў магчымасць пагутарыць з калегам не толькі падчас двухбаковай сустрэчы, але і ў перапынках паміж мерапрыемствамі, якія праходзілі з удзелам кіраўнікоў урадаў ЕАЭС. У пятніцу ў Алматы адбылося пасяджэння Еўразійскага Міжурадавага савета.
Раней стала вядома, што кантакты на ўзроўні прэзідэнтаў Беларусі і Расіі ў бліжэйшы час не плануюцца, але яны могуць з'явіцца, калі прэзідэнты палічаць гэта мэтазгодным. Пра гэта паведаміў у пятніцу прэс-сакратар прэзідэнта РФ Дзмітрый Пяскоў. Пры гэтым ён дадаў, што кансультацыі працягваюцца на экспертным і высокім узроўні.