МІНСК, 24 лют - Sputnik. Гуманітарную дапамогу адправілі ў горад Чунцын Мінская вобласць і Беларускі цэнтр турыстычнай і культурнай прадукцыі, пра гэта паведамілі ў прэс-службе Мінаблвыканкама ў панядзелак.
"Гэты шматмільённы горад з'яўляецца пабрацімам Мінскай вобласці (...). Ад Чунцына паступіў афіцыйны зварот аб аказанні дапамогі. Вядома, мы не маглі пакінуць без падтрымкі жыхароў гэтага рэгіёну", - патлумачыла начальнік упраўлення знешнеэканамічных сувязяў камітэта эканомікі Мінаблвыканкама Ганна Дашкова.
Яна дадала таксама, што "сябры пазнаюцца не толькі ў радасці, але і ў бядзе". Паведамляецца, што ў Чунцын былі дастаўлены аднаразовыя медыцынскія маскі, яны ўжо перададзеныя кіраўніцтву горада.
Нагадаем, у канцы студзеня і пачатку лютага Беларусь адпраўляла ў Кітай самалёты з гуманітарнай дапамогай для барацьбы з каронавірусом. Як адзначыў кітайскі пасол у Беларусі Цуй Цымін, Беларусь стала першай краінай, якая па ўказанні прэзідэнта накіравала матэрыяльную дапамогу ў КНР (і на той момант адзінай дзяржавай, якая накіравала другі груз для аказання дапамогі).
Тады былі перададзеныя антыбіётыкі, індывідуальныя сродкі абароны (рэспіратары, халаты, пальчаткі, ахоўныя маскі, бахілы), а таксама розныя дэзінфікуючыя сродкі. У прэс-службе Мінаблвыканкама ўдакладнілі, што кампаніі з Мінскай вобласці таксама прынялі ўдзел у фарміраванні грузаў.