ГРОДНА, 9 мая - Sputnik, Іна Грышук. Мітынг з ускладаннем кветак ля Вечнага агню прайшоў 9 Мая ў парку Жылібера ў Гродне. Мерапрыемства прайшло ва ўрачыстай абстаноўцы, але без вялікай колькасці людзей.
Да Вечнага агню ў гэтую раніцу прыйшлі кіраўніцтва горада і вобласці, дэпутаты, ваенныя, кіраўнікі буйных прадпрыемстваў. Неслі вянкі і чырвоныя гваздзікі, іграў духавы аркестр, гучалі песні ваенных гадоў.
Сярод прысутных можна было ўбачыць некалькі пажылых людзей з медалямі, якія памятаюць вайну. Яны таксама ўсклалі кветкі і ўшанавалі памяць загінулых хвілінай маўчання.
Мітынг завяршыўся трохразовым залпам з гармат. Пасля гэтага ускласці кветкі або проста падысці да Вечнага агню прыходзілі звычайныя гараджане. Іх таксама было няшмат.
Як раней паведамляў Sputnik, святкаванне 75-й гадавіны Перамогі ў Вялікай Айчыннай вайне ў Гродне ў гэтым годзе праходзіць без масавых мерапрыемстваў. Былі адмененыя парад, святочныя канцэрты, акцыі і гулянні, якія прадугледжваюць вялікія групы людзей. Таксама ў горадзе вырашылі не запрашаць на мерапрыемствы ветэранаў ВАВ. Іх павіншавалі напярэдадні ў новым фармаце - для кожнага арганізавалі міні-канцэрты і міні-шэсце з духавымі аркестрамі ў дварах дамоў, дзе жывуць удзельнікі вайны, што засталіся ўжывых.
Напярэдадні 9 Мая ў горадзе прайшлі ўскладанні кветак да брацкіх магіл, а таксама акцыі ў сацыяльных сетках. Спецыяльна да свята горад упрыгожылі чырвонымі і зялёнымі сцягамі, высадзілі кветкі на клумбах у цэнтры і на ўскраінах, усталявалі новыя фота-зоны на тэму Перамогі.
Святочны дзень завершыцца салютам, які запусцяць у 23:00. У гэтым годзе гараджанам, якія вырашылі палюбавацца ім ужывую, рэкамендавана выбіраць адну з шасці краявідных пляцовак - плошча Леніна, плошча Савецкую, паркоўку каля стадыёна "Нёман", прывакзальны пляц ля чыгуначнага вакзала, пляцоўкі каля драматычнага тэатра па вуліцы Маставой і ў ратонды на вуліцы Дарвіна.