МІНСК, 25 мая - Sputnik. Прэзідэнт Беларусі Аляксандр Лукашэнка заявіў, што мае намер абмеркаваць з кітайскім лідарам Сі Цзіньпінам супрацоўніцтва краін у ракетабудаванні.
У пятніцу, 22 мая, Лукашэнка наведаў доследна-выпрабавальны ўчастак навукова-вытворчага таварыства з абмежаванай адказнасцю "ОКБ ТСП" пад Мінскам, дзе яму ў тым ліку было даложана аб развіцці ракетабудавання ў краіне. У Мачулішчах Лукашэнку паказалі перспектыўныя ўзоры ўзбраенняў. Зараз айчынны ВПК збірае кітайскія ракеты і паралельна займаецца распрацоўкай уласнай ракеты, якая зможа паражаць цэлі на адлегласці да 300 кіламетраў.
Лукашэнка паставіў задачу распрацаваць сваю ракету, і распрацоўшчыкі запэўнілі прэзідэнта, што да верасня павінен з'явіцца першы вопытны ўзор "трохсоткі".
Кіраўнік дзяржавы таксама адзначаў, што Беларусі пашанцавала дамовіцца з кітайцамі аб супрацоўніцтве пры распрацоўцы і выпрабаваннях беларускай РСЗА "Паланэз" і ракеты да яе, "але далей залежнасці гэтай (знешняй - Sputnik) быць не павінна".
Згодна з паказаным у нядзелю сюжэтам тэлеканала АНТ, старшыня Дзяржаўнага ваенна-прамысловага камітэта Беларусі Раман Галоўчанка, дакладваючы прэзідэнту аб стварэнні ўласнай ракеты з далёкасцю да 300 кіламетраў, адзначыў, што "кітайскія таварышы, калі пачалі разумець, што ў нас нешта атрымліваецца і мы зніжаем узровень залежнасці ад іх, у тым ліку ў закупцы элементаў, пачалі такія ўсходнія хітрасці".
"Давайце тады або на маім узроўні нейкім чынам у бліжэйшы час перагаворым - я з Сі Цзіньпінам гатовы перагаварыць на гэтую тэму. Не думаю, што гэта будзе вялікай праблемай", - адказаў Лукашэнка.
Пры гэтым ён заявіў, што разумее збольшага кітайскі бок. "Вядома, і вы, і яны бізнесмены. Яны недзе спрабуюць адціснуць. Але ёсць жа і іншыя рычагі", - сказаў прэзідэнт.
Лукашэнка растлумачыў, што вінаваціць кітайцаў няма чаго: перадавыя распрацоўкі любой звышдзяржавы знаходзяцца пад грыфам "цалкам сакрэтна", але беларускія канструктары прайшлі шлях ад рамонту тэхнікі да стварэння ўласных узораў.
Беларусь працягвае актыўна развіваць ваенна-прамысловы комплекс, упор пры гэтым робячы на экспарт. У год рэспубліка прадае ўзбраенні на суму больш за мільярд долараў.