Набываючы карціны на аўкцыёнах, у прыватных калекцыях і вяртаючы іх у Беларусь, Белгазпрамбанк даў магчымасць беларусам бачыць працы сваіх землякоў.
Ніхто не хаваў каштоўныя артэфакты ад знатакоў высокага мастацтва па кабінетах, не развозіў па дамах. Уся калекцыя была ў адкрытым доступе і шмат экспанавалася, у тым ліку, і ў рэгіёнах і нават за мяжой змаглі даведацца аб культурным здабытку беларусаў.
Цяпер уся калекцыя, каля 150 твораў мастацтва, далучана да "справы Белгазпрамбанка". У эфіры беларускага тэлебачання растлумачылі, што карціны "рыхтавалі да тэрміновага вывазу з краіны".
Фінансавая міліцыя прыйшла ў Белгазпрамбанк з ператрусамі 11 чэрвеня. У КДК заявілі аб узбуджэнні крымінальнай справы за фінансавыя махінацыі - ухіленне ад выплаты падаткаў і легітымізацыю атрыманых злачынным шляхам сродкаў. Затым былі затрыманыя 15 чалавек - як з кіраўніцтва банка, так і з прыватных структур.
Толькі па мінімальных папярэдніх ацэнках экспертаў агульная сума калекцыі банка можа складаць 20 мільёнаў долараў. Самая дарагая ў гісторыі беларускага мастацтва карціна пэндзля Хаіма Суціна - "Ева", знаходзілася менавіта ў калекцыі Белгазпрамбанка. Набывалася палатно на аўкцыёне, і толькі пачатковы яго кошт набліжаўся да 2 мільёнам долараў.
Цяпер ні адзін беларус не зможа палюбавацца дарагімі палотнамі. Іх месцы занялі незвычайныя сімвалы - на апусцелых сценах вісяць шыльды з QR-кодамі. Глядзіце на відэа, як асірацела без сваіх перлін выстава.