МІНСК, 25 чэр - Sputnik. Агульны аб'ём запазычанняў на ўнутраным і знешнім рынках ад пачатку года перавысіў 1,5 мільярда долараў, паведаміў міністр фінансаў Юрый Селіверстаў.
Паводле яго слоў, вясной гэтага года крэдытныя рэсурсы прыцягваліся як на Маскоўскай біржы, так і на ўнутраным рынку рэспублікі. Агульная сума ўзятых у крэдыт грошай склала каля 300 мільёнаў долараў.
Міністр фінансаў расказаў дэпутатам у чацвер падчас слуханняў у парламенце, што на мінулым тыдні "забяспечана рэалізацыя здзелкі па размяшчэнні еўрабондаў на Лонданскай біржы на суму 1,25 мільярда долараў".
"З іх 750 мільёнаў долараў - дзесяцігадовыя запазычанні, 500 мільёнаў долараў - пяцігадовыя", - дадаў Юрый Селіверстаў.
Пры гэтым ён удакладніў, што міністэрства фінансаў плануе прыцягнуць запазычанні ў памеры каля 500 мільёнаў долараў на ўнутраным рынку з удзелам расійскіх банкаў.