МІНСК, 11 вер - Sputnik. Збор грашовых сродкаў у школах з'яўляецца выключна добраахвотнай дзейнасцю, заявіў міністр адукацыі Ігар Карпенка.
"Ніхто не мае права прымушаць і тым больш маніпуляваць. Я заўсёды прытрымліваўся таго прынцыпу, што школа не павiнна патрабаваць і не мусіць выбудоўваць нейкія рэйтынгі ў гэтым плане - хто колькі даў", - сказала кіраўнік ведамства.
Інтэрв'ю Ігара Карпенкі апублікавала прэс-служба Мінадукацыі ў сваім Telegram-канале. Падчас размовы міністр падкрэсліў, што дзяржава фінансуе ўсе патрэбы навучальных устаноў.
"Тое, што выдзяляецца, тое, што па бюджэтах вызначана. А мы, дарэчы, перайшлі на нарматыўную форму фінансавання агульнай сярэдняй адукацыі. Мы доўга працавалі ў эксперыменце. Зараз нарматыў вылучаецца, гэта значыць, гэта дазваляе канкрэтнай тэрыторыі, канкрэтнай установе адукацыі вызначыць, куды важней накіраваць гэтыя грошы", - растлумачыў Карпенка.
Ён дадаў, што на выпадак ахвяраванняў адкрыты рахункі апякунскага савета. Аднак, паводле яго слоў, гэта павінна быць выключна добраахвотная ініцыятыва.
"Гэта выключна добраахвотная дзейнасць", - пазначыў міністр.
Таксама Карпенка падкрэсліў, што прыносіць класнаму кіраўніку наяўныя грошы на куплю рэчаў для класа забаронена.
"Гэта нарматыўкай прапісана, што ні ў якім разе гэтага рабіць нельга. Па-першае, класны кіраўнік ніколі не возьме гэтыя грошы. Калі ён бярэ, будзем так казаць, ён ужо ідзе па шляху карупцыйнага злачынства. Таму не трэба і класнага кіраўніка падстаўляць, і сябе падстаўляць пад гэтыя рэчы", - заявіў міністр адукацыі.
Карпенка дадаў, што некаторыя бацькі самі выступаюць з ініцыятывай купіць нешта ў школу. Міністр прывёў у прыклад кулер для вады. Аднак, на яго думку, з гэтым не трэба перабіраць меру.
"Не трэба перабіраць меру. Калі дзіцяці патрэбныя нейкія вільготныя сурвэткі, можна купіць іх у малым фармаце і пакласці дзіцяці ў партфель. У многіх школах сёння, асабліва ў горадзе Мінску, ёсць у класах індывідуальныя шафкі для дзіцяці. Туды можна купіць і пакласці неабходныя прадметы", - сказаў Ігар Карпенка.