МІНСК, 27 ліс - Sputnik. Беларускія дактары вылечылі ад каронавіруса пацыента ва ўзросце 101 года, паведаміў у эфіры тэлеканала АНТ загадчык кафедры інфекцыйных хвароб і дзіцячых інфекцый БелМАПА Юрый Горбіч.
Паводле яго слоў, у рэспубліцы медыкі навучыліся лячыць COVID-19. Пратаколы ў беларускіх бальніцах мяняюцца хутка: калі ў іншых краінах з'яўляюцца эфектыўныя спосабы барацьбы з гэтай хваробай, іх адразу бяруць на ўзбраенне ў Беларусі.
Горбіч адзначыў, што ў краіне ёсць пажылыя грамадзяне (старэйшыя за 80 гадоў), у якіх дыягнаставаны каронавірус, але ім аказваюць кваліфікаваную дапамогу.
"У Беларусі быў пацыент ва ўзросце 101 года", - сказаў прадстаўнік БелМАПА.
Адказваючы на пытанне, калі скончыцца пандэмія, ён працытаваў словы дырэктара Нацыянальнага інстытута алергіі і інфекцыйных хвароб ЗША Энтані Фаучы: вакцынацыя дапаможа, але не вырашыць праблему, таму меры сацыяльнага дыстанцыяваньня і іншыя спосабы абароны грамадзян працягнуцца месяцы, і хацелася б верыць, што ўсё завершыцца ў 2022 годзе.
Паводле інфармацыі Міністэрства аховы здароўя Беларусі, у рэспубліцы па стане на чацвер зафіксавана 130012 выпадкаў заражэння каронавірусам. За мінулыя суткі памерлі дзевяць чалавек, а агульная колькасць смяротных вынікаў склала 1128.