МІНСК, 5 сту – Sputnik. Беларускі прэзідэнт Аляксандр Лукашэнка ўказам, падпісаным у панядзелак, зацвердзіў план падрыхтоўкі законапраектаў на бягучы год, паведамілі ў прэс-службе кіраўніка дзяржавы.
Ключавымі крытэрыямі пры складанні плана сталі патрэбнасць грамадства ва ўрэгуляванні пэўных адносін і прыярытэтнасць іх прававой рэгламентацыі.
"Асаблівая ўвага надавалася захаванню патрабаванняў сістэмнасці, комплекснасці і стабільнасці прававога рэгулявання", - сказалі ў прэс-службе.
У бягучым годзе ў планах - падрыхтаваць 34 законапраекты: гэта прынцыпова новыя "Аб валанцёрскай дзейнасці", "Аб лізінгавай дзейнасці", "Аб страхавой дзейнасці", "Аб аб'яднаннях наймальнікаў", "Аб рэгуляванні бяспекі пры выкарыстанні атамнай энергіі", а таксама тыя, якія актуалізуюць дзеючае заканадаўства.
У прэс-службе ўдакладнілі, што з запланаваных да падрыхтоўкі 27 законапраектаў у парламент ўнясе ўрад.
Прадугледжана, што ў 2021 годзе будуць распрацаваны канцэпцыі законаў аб абыходжанні з генетычнымі рэсурсамі, аб дыпслужбе і аб акрэдытацыі ў нацсістэме акрэдытацыі.
Чытайце таксама:
- Дэпутаты прынялі новыя праекты адміністрацыйнага заканадаўства
- Па даручэнні прэзідэнта ў Беларусі абновяць закон аб дзяржаўнай службе
- У золаце і срэбры: дэпутаты прынялі абноўлены закон аб дзяржсімвалах РБ