МІНСК, 14 сту – Sputnik. Аляксандр Лукашэнка зацвердзіў папраўкі ў нарматыўныя акты аб адміністрацыйных правапарушэннях, а таксама ў працэсуальна-выканаўчы кодэкс, паведамілі ў Адміністрацыі прэзідэнта Беларусі.
Раней папраўкі былі адобраны ў парламенце, яны набудуць сілу ўжо 1 сакавіка 2021 года.
Што зменіцца?
Сярод прыкметных навін - лібералізацыя адміністрацыйнай адказнасці, спрашчэнне парадку прыцягнення юрыдычных і фізічных асоб.
Таксама, як перадае телеграм-канал "Пул першага", блізкі да прэс-службы прэзідэнта, у дакуменце ўводзіцца адказнасць за выкарыстанне забароненай сімволікі. Па новым кодэксе, за сцяг на балконе можна будзе атрымаць штраф: да 580 рублёў для фізічнай асобы і да 1740 рублёў - для юрыдычнай.
Заяўляецца, што новыя КаАП і ПВКаАП змяняюць характар на прафілактычны і папераджальны.
Змены былі распрацаваны па даручэнні прэзідэнта Беларусі. Экспертную міжведамасную камісію ўзначаліла намеснік кіраўніка Адміністрацыі Вольга Чупрыс.
Як ішла праца над кодэксам
У чэрвені 2020 года на нарадзе па праектах абноўленых кодэксаў кіраўнік дзяржавы падкрэсліваў, што забароны і абмежаванні павінны застацца толькі там, дзе яны аб'ектыўна неабходныя: калі ёсць рызыка прычынення шкоды жыццю і здароўю грамадзян, узнікнення надзвычайных сітуацый.
"Не трэба чапляцца да людзей па дробязях", - запатрабаваў тады прэзідэнт.
Так, з КаАП былі выключаны 110 норм, якія дзейнічалі раней, а 230 санкцый - скарэктаваны.
"Уводзяцца такія меры, як папярэджанне, вусная заўвага і прафілактычныя меры ў дачыненні да непаўналетніх. Адбываецца градацыя адміністрацыйных правапарушэнняў на тры катэгорыі: адміністрацыйныя праступкі, значныя і грубыя адміністрацыйныя правапарушэнні. Такім чынам, уводзіцца такі парадак, пры якім магчыма вызваленне ад адміністрацыйнай адказнасці асобы, што ўчыніла адміністрацыйны праступак, і якой будзе аб'яўляцца папярэджанне, якое ўжо не будзе з'яўляцца адміністрацыйным спагнаннем", - раней тлумачыў дырэктар Нацыянальнага цэнтра заканадаўства і прававых даследаванняў Вадзім Іпатаў.