МІНСК, 18 сту – Sputnik. Канчатковае рашэнне па правядзенні чэмпіянату свету па хакеі ў 2021 годзе павінна быць прынята да канца студзеня на савеце Міжнароднай федэрацыі хакея.
Пасля візіту ў Мінск Рэнэ Фазелю амаль штодня даводзіцца адмахвацца ад крытыкі, каментаваць лёс маючага адбыцца турніру і яго магчымы перанос. У інтэрв'ю Watson, напрыклад, ён запэўніў, што з-за пандэміі каронавіруса чэмпіянат не адменяць, як гэта адбылося ў 2020-м. Фазель гатовы правесці матчы без гледачоў, калі будзе такая неабходнасць.
"Ці хутка будзе рашэнне па чэмпіянаце свету? Напэўна, на наступным тыдні. Што будзе, калі чэмпіянат свету адбяруць у Беларусі? Ёсць план Б. Я не ведаю, дзе пройдзе чэмпіянат свету ў такім выпадку, але ёсць абмеркаванні. Данія і Славакія? Не магу адказаць на гэтае пытанне. Чэмпіянат свету адбудзецца. У якім выглядзе - мы пакуль не ведаем. Але мы можам правесці яго без гледачоў", - цытуюць Фазеля СМІ.
Пракаменціраваў Фазель і нядаўні візіт у Мінск. Ён заявіў, што фатаграфіі з Аляксандрам Лукашэнкам і старшынёй ФХБ Дзмітрыем Баскавым былі "няправільна вытлумачаны".
"Я прыехаў не для таго, каб выпіць з ім гарэлкі. Нашай мэтай было знайсці разам з Лукашэнкам вырашэнне пытання", - прыводзяць словы Фазеля СМІ.
З нагоды фатаграфіі з Баскавым Фазель адзначыў, што кіраўнік ФХБ сам папрасіў аб сумесным здымку, госць "і выказаць здагадку не мог, што ён будзе выкладаць іх у публічны доступ". У такіх сітуацыях разумееш, што табой маніпуліруюць, рэзюмаваў Фазель.