МІНСК, 12 сак – Sputnik. Здабычу шызых галубоў дазволілі ў Беларусі падчас вясновага палявання на птушыную дзічыну. Дадзеная норма змяшчаецца ў новых Правілах палявання і вядзення паляўнічай гаспадаркі Беларусі, якія ўступілі ў сілу ад пачатку гэтага года.
Падрыхтоўка, абмеркаванне новага дакумента ішло амаль два гады. Сярод асноўных навацый, якія датычацца тэрмінаў дазволу на захоўванне зброі, павелічэння тэрмінаў палявання на некаторыя віды жывёл, з'явілася і вясновае паляванне на голуба.
"Сапраўды, згодна з новымі Правіламі, дазволілі здабычу голуба шызакрылага падчас вясновага палявання на птушыную дзічыну. Пры распрацоўцы гэтай нормы ўлічвалася неабходнасць рэгулявання колькасці гэтага віду", - распавёў Sputnik паляўнічы са шматгадовым стажам.
Паводле яго слоў, гаворка менавіта пра рэгуляванні колькасці шызакрылага голуба, які, як вядома, з'яўляецца пераносчыкам розных інфекцыйных захворванняў.
Суразмоўца агенцтва адзначыў, што сярод вопытных паляўнічых дадзенае новаўвядзенне выклікала "па меншай меры, усмешку". "Мне яно здалося дзіўным. Які вопытны паляўнічы, пачне страляць па галубах падчас палявання на гусака або качара", - сказаў і дадаў, што "гэта вельмі асцярожныя птушкі і спудзіць іх можа любы шоргат, а не тое што стрэл".
Паляўнічы таксама распавёў, што паляванне на галубоў у Беларусі дазволена ўжо амаль 20 гадоў, у асноўным палююць на вехіра. "Ёсць дастатковая колькасць паляўнічых, якія здабываюць вехіра, мяса якога мяккае, белае і досыць сакавітае пры падрыхтоўцы", - растлумачыў суразмоўца агенцтва.
Згодна з зацверджанымі правіламі, вясновае паляванне па пяру пачынаецца з другой суботы сакавіка. Дазваляецца ружэйнае паляванне на пралётных гусей, качароў. Паляванне дазваляецца ў светлы час сутак, акрамя перыяду з 12 да 18 гадзін. Для вышуку і падачы здабытай дзічыны можна выкарыстоўваць паляўнічых сабак - тэр'ераў, такс, лягавых, спаніэляў, рэтрывераў, водных сабак.