МІНСК, 8 кра – Sputnik. Візіт прэм'ер-міністра Індыі Нарэндры Модзі стаў бы добрым стымулам для развіцця двухбаковых адносін, заявіў прэзідэнт Беларусі Аляксандр Лукашэнка, прымаючы ў Палацы Незалежнасці пасла Індыі Сангіту Бахадур.
Паводле слоў Аляксандра Лукашэнкі, Беларусь і Індыя за дзесяцігоддзі супрацоўніцтва не толькі зразумелі, але і вывучылі адзін аднаго. Пры гэтым ужо наступіў момант для заключэння канкрэтных дагавораў і кантрактаў, каб далей ісці на шляху развіцця супрацоўніцтва.
"Я мяркую, што патрэбен нейкі штуршок, нейкі стымул для таго, каб мы пачалі практычна рэалізоўваць нашы задумы. Думаю, што добрым стымулам развіцця нашых адносін быў бы візіт Нарэндры Модзі ў Беларусь", - сказаў кіраўнік дзяржавы.
Пасля чаго дадаў, што добра знаёмы з індыйскім прэм'ер-міністрам і нават у пэўнай ступені сябруе з ім, што выяўляецца ў падтрымцы адзін аднаго.
"Мне здаецца, што яму трэба было б ужо пабываць у Беларусі. І яго афіцыйны візіт, мы яго прымем годна, стаў бы такім трыгерам у адносінах паміж нашымі краінамі па ўсіх напрамках", - лічыць Аляксандр Лукашэнка.
Тавараабарот вырас у 10 разоў
Беларускі лідэр выказаў словы падзякі Сангіце Бахадур за праведзеную падчас дыпламатычнай місіі працу. Прычым ён звярнуў увагу, што апошнія дзесяцігоддзі тавараабарот паміж Беларуссю і Індыяй вырас у 10 разоў.
"Крыху больш за паўмільярда долараў. Гэта, вядома, прыстойна, але недастаткова для нашых магчымасцей. Мы можам больш. І вы гэта лепш за мяне ведаеце", - канстатаваў Аляксандр Лукашэнка.
Пры гэтым ён сказаў, што чакае ад наступнага індыйскага пасла такога ж жадання наладжваць добрыя і плённыя адносіны паміж дзвюма дзяржавамі. Таму што за гэты час зроблена многае і намечана таксама нямала.
"Думаю, надышоў той час, калі нам трэба свае магчымасці і жаданні аб'яднаць і зрабіць некалькі крокаў да цеснага супрацоўніцтва", - прапанаваў кіраўнік дзяржавы.
Беларусь нарасціла прысутнасць у Індыі
У сваю чаргу Сангіта Бахадур падзякавала беларускаму лідэру за аказаны гонар сустрэцца асабіста. "Я добра ведаю, што не ўсе паслы ўдастойваюцца аўдыенцыі з вамі", - сказала індыйскі дыпламат.
Аляксандр Лукашэнка ў адказ нагадаў, што паміж дзвюма краінамі складваюцца добрыя адносіны яшчэ з часоў Савецкага Саюза.
"Вы - нашы сябры. Як я мог не прыняць вас?" - рытарычна спытаўся ён.
"Сапраўды, мы шмат чаго дасягнулі за тры гады маёй кадэнцыі тут. Мы істотна нарасцілі гандаль, Беларусь нарасціла сваю прысутнасць у Індыі", - прызнала Сангіта Бахадур.
Паводле яе слоў, актывізавалася супрацоўніцтва паміж прадстаўнікамі бізнесу дзвюх краін. БелАЗ наладжвае сувязі з індыйскай кампаніяй Coal India Limited.
"Я памятаю часы, калі спадар Мясніковіч (у бытнасць старшынёй Савета Рэспублікі - Sputnik) задаваў мне пытанне, чаму Індыя не закупляе беларускую тэхніку. І тут я магу нясціпла заўважыць, што я сапраўды старалася, і сёння мы маем вынік", - асабліва адзначыла пасол Індыі.
Чытайце таксама:
- БелАЗ упершыню выходзіць на рынак Індыі
- Індыя разлічвае на падаўжэнне калійнага кантракту на ранейшых умовах
- Узброены да... ботаў: у Індыі прадставілі абутак, які страляе