Прэм'ера абноўленага "Лебядзінага возера" ў пастаноўцы мастацкага кіраўніка Вялікага тэатра Валянціна Елізар'ева адбылася ў суботу 15 траўня.
"Лебядзінае возера" Пятра Ільіча Чайкоўскага на працягу ўсяго XX стагоддзя быў і па-ранейшаму застаецца самым папулярным балетным спектаклем у свеце, і менавіта з яго многія пачынаюць знаёмства з мастацтвам балета.
Прыхільнікам легендарнага спектакля ў абноўленай беларускай версіі абяцаны новыя харэаграфічныя і музычныя фрагменты, якія маэстра Елізар'еў рыхтаваў асабіста. Пры гэтым беларускі харэограф з сусветным імем захаваў у балеце аснову харэаграфіі Марыуса Пеціпа, Льва Іванова і Асафа Месэрэра.
Беларуская трупа не раз вазіла "Лебядзінае возера" на замежныя гастролі, і сам Елізар'еў таксама ставіў гэты балет не толькі на радзіме ў Мінску, але і ў Токіа.
Мастаком-пастаноўшчыкам абноўленага балета выступіў народны мастак Расіі Вячаслаў Окунеў, з ім маэстра Елізар'еў ужо ствараў нацыянальны балет "Страсці (Рагнеда)", які атрымаў Дзяржпрэмію Беларусі. Акрамя таго, адна з нядаўніх работ Окунёва для беларускай сцэны - опера "Князь Ігар".
Новую музычную рэдакцыю балета стварыў дырыжор Уладзімір Авадок, захаваўшы пры гэтым арыгінальную партытуру вялікага Чайкоўскага.
Галоўныя балетныя партыі ў абноўленым "Лебядзіным возеры" - ролі Адэты (Адыліі) і Зігфрыда выконваюць як вопытныя народныя артысты Ірына і Алег Яромкіны, так і малады сцэнічны дуэт Людміла Уланцава і Арцём Банькоўскі.
Па запрашэнні Валянціна Елізар'ева на сцэну вярнулася заслужаная артыстка Беларусі Таццяна Шаметавец, у "Лебядзіным возеры" дасведчаная балерына выконвае ролю каралевы.
На прэс-канферэнцыі напярэдадні галоўнай прэм'еры сезона маэстра Елізар'еў прызнаўся, што даўно рыхтаваўся да гэтай працы, даследаваў гістарычныя матэрыялы, уздымаў архівы. Гаворка ідзе не толькі пра рэстаўрацыю харэаграфіі і больш лагічнай драматургіі, але і аб вяртанні ў спектакль нумароў, якія паступова знікалі з пастаноўкі: рускі танец, танец блазнаў, асобныя мізансцэны і вялікія сцэны, а таксама аб аднаўленні арыгінальных другога і чацвёртага актаў. У выніку "Лебядзінае возера" вяртаецца на сцэну ў новым мастацкім выглядзе.
І ў завяршэнне сюрпрыз ад маэстра Елізар'ева: фінал "Лебядзінага возера" абяцаны шчаслівым.