"Для нас гэта сумнае свята. Раней мы хацелі сысці са школы, а цяпер не хочам развітвацца са школьнымі сябрамі", - распавялі Sputnik выпускніцы Дыяна і Аліна, якія прыйшлі ў Летні амфітэатр.
Па іх словах, вызначыцца, кім стаць у будучыні, было складана, але, нягледзячы на гэта, Дзіяна ўжо вырашыла, што зоймецца бізнэсам. Аліна пакуль у роздуме.
"У гэтым годзе з віцебскіх школ выпускаюць 2 758 дзевяцікласнікаў і 1 753 11-класнікаў. Я ўпэўнены, што мы падрыхтавалі годнае пакаленне для жыцця ў новым інфармацыйным грамадстве, за што варта падзякаваць настаўнікаў і бацькоў", - вітаў выпускнікоў начальнік аддзела адукацыі Віцебскага гарвыканкама Ігар Кіруценка.
Ён падкрэсліў, што цяпер толькі ад ведаў, атрыманых хлопчыкамі і дзяўчатамі, залежыць іх будучыня.
Як адзначыла класны кіраўнік віцебскай сярэдняй школы №43 Ірына Красноўская, "Апошні званок" - заўсёды кранальнае і хвалюючае мерапрыемства.
"Дзецям хочацца даць усё самае лепшае і ў вялікім аб'ёме, каб яны прынялі гэта і пранеслі скрозь жыццё. Я з вялікім гонарам выпускаю дзяцей, яны выдатныя, я імі вельмі ганаруся і ведаю, што ў іх усё атрымаецца" - адзначыла класны кіраўнік.