ГРОДНА, 14 чэр – Sputnik, Іна Грышук. У адзінай польскамоўнай школе, якая больш за 20 гадоў працуе ў Гродна і ў якой усе прадметы выкладаюцца толькі на польскай мове, хочуць адкрыць першы ў гісторыі навучальнай установы клас, дзе навучанне будзе весціся выключна па-беларуску.
Чакаецца, што гэта будзе першы крок у паступовым перакладзе навучання польскай школы на дзяржаўныя мовы.
Гаворка ідзе пра сярэднюю школу №36 з польскай мовай навучання ў Гродна, якая была пабудавана больш за 20 гадоў таму на сродкі польскага боку і на працягу многіх гадоў пазіцыянавала сябе як навучальная ўстанова, у якой дзеці з польскімі каранямі могуць вывучаць польскую мову і культуру.
Усе прадметы тут выкладаюць на польскай мове, школьны каляндар прывязаны да польскіх дзяржаўных і рэлігійных свят, большая частка педагагічнага калектыву навучалася ў Польшчы.
Школа №36 с польским языком обучения в Гродно
© Sputnik / Инна Гришук
Як тлумачаць у самой школе, ідэя адкрыць першы клас з беларускай мовай навучання належыць гарадскому аддзелу адукацыі. Па задумцы, усе прадметы тут будуць выкладацца на беларускай мове, з першага па 11 класы праграма навучання будзе ўключаць гадзіну польскай мовы і гадзіну польскай літаратуры на тыдзень. Пачынаючы з трэцяга класа, дзеці будуць вучыць англійскую.
У школе, праўда, папярэджваюць, што для навучальнай установы гэта будзе першы вопыт выкладання выключна на беларускай мове.
Пакуль гродзенскія бацькі не вельмі актыўна нясуць дакументы ў першы беларускамоўны клас, і адміністрацыя не гатова даць дакладны адказ, ці атрымаецца яго сфарміраваць. Падаць дакументы бацькі могуць на працягу ўсяго лета.
Меркаванне бацькоў
Як патлумачылі Sputnik бацькі першакласніка, якія хочуць, каб дзіця навучалася на беларускай, яны, хутчэй за ўсё, пададуць дакументы ў суседнюю школу №32, дзе таксама ідзе набор у беларускамоўны клас.
"У 32-й школе больш вопыту ў выкладанні на беларускай мове. У польскай 36-й школе дзіцяці можа быць некамфортна псіхалагічна. Там усе вучні вучацца на польскай, шмат хто кажа на польскай. З плюсаў тое, што дзіця зможа вучыць яшчэ і польскую мову, але гэта толькі адзін урок на тыдзень. З мінусаў - у польскай школе могуць быць праблемы з беларускамоўнымі настаўнікамі пасля заканчэння пачатковых класаў. Для іх гэта ўсё ж такі першы вопыт", - дзеліцца развагамі мама будучага першакласніка Алена.
Як тлумачаць у гродзенскім гарвыканкаме, у планах паступова пераводзіць вывучэнне асноўных прадметаў у польскай школе ў Гродне на нацыянальныя мовы, але захоўваць пры гэтым вывучэнне польскай мовы, літаратуры, культуры. Абяцаюць, што ў новым навучальным годзе гэтыя навіны не закрануць ужо сфарміраваныя класы з выключна польскай мовай навучання.
Чытайце таксама: