МІНСК, 29 чэр - Sputnik. Беларусь рыхтуецца падпісаць пагадненне аб супрацоўніцтве з фондам "Сколкава", заявіў першы намеснік міністра эканомікі рэспублікі Юрый Чабатар, выступаючы ў рэжыме відэаканферэнцыі на VIII Форуме рэгіёнаў Расіі і Беларусі.
Паводле яго слоў, ведамства плануе падпісаць з фондам праект аб супрацоўніцтве ў галіне інавацыйнага, лічбавага і кластэрнага развіцця. Пагадненне дазволіць айчынным стартапам карыстацца ўсімі сэрвісамі фонду - ад інфармацыйнай падтрымкі да прасоўвання на рынку.
"Сёння нашым краінам патрэбны спалучаны інавацыйны і вытворчы патэнцыял, трэба ісці і далей у рэалізацыі сумесных праектаў", - адзначыў першы намеснік міністра.
Інавацыйны цэнтр у Брэсце
Чабатар таксама распавёў, што з 2020 года Мінэканомікі рэалізуе праект стварэння пілотнага доследна-дэманстрацыйнага цэнтра развіцця смарт-індустрыі. Цэнтр будзе грунтавацца ў Брэсцкім тэхнапарку. Па словах Чабатара, гэты праект дапаможа забяспечыць пераход Беларусі да тэхналогій чацвёртай прамысловай рэвалюцыі. Ён таксама адзначыў, што донарам праекта выступіла Расія, на першым этапе бюджэт склаў 1 мільён долараў.
"Чакаецца, што ўвод у дзеянне цэнтра адбудзецца ў 2022 годзе", - удакладніў першы намеснік міністра эканомікі Беларусі.
Юрый Чабатар разлічвае, што цэнтр у Брэсце стане важнай пляцоўкай для супрацоўніцтва з фондам "Сколкава", а сам Брэсцкі тэхнапарк атрымае статус цэнтра камерцыялізацыі інавацый і будзе выступаць аператарам "Сколкава" ў заходнім рэгіёне Беларусі.
"У выпадку поспеху праекта ў нас ёсць намер маштабаваць яго на два прымежных з РФ рэгіёны - Магілёўскую і Віцебскую вобласці", - растлумачыў ён.
Фонд "Сколкава" - навукаграда, створаны ў Падмаскоўі ў 2010 годзе. На сённяшні дзень колькасць рэзідэнтаў "Сколкава" ужо перавысіла 2,8 тысячы.