МІНСК, 21 ліп - Sputnik. Апошняя прадстаўніца роду Радзівілаў Эльжбета Радзівіл памерла на 104-м годзе жыцця, распавёў Sputnik дырэктар Нясвіжскага музея-запаведніка Дзмітрый Яшчанка.
"Апошні яе візіт у Беларусь быў у 2009 годзе. Яна наведвала Нясвіжскі і Мірскі замкі, а таксама архівы ў Мінску. Дзе будзе Эльжбета пахавана, нам пакуль невядома. Фамільная крыпта Радзівілаў у Нясвіжы знаходзіцца на рэстаўрацыі, пахаванні там не вядуцца", - растлумачыў ён.
Эльжбета Радзівіл нарадзілася у Лондане 21 кастрычніка 1917 года. Неўзабаве пасля яе нараджэння бацькі развяліся. Бацька Альбрэхт вярнуўся ў радавы маёнтак у Нясвіж, а яна з маці жыла ў розных краінах Еўропы. Па словах навуковых супрацоўнікаў Нясвіжскага музея-запаведніка, яна прыязджала ў замак да бацькі кожнае лета.
"У замку ў яе было тры пакоі, цяпер гэта залы прыватных калекцый. З 1935-га, калі памёр яе бацька, да пачатку 90-х яна не была ў Нясвіжы. Паўафіцыйны візіт у яе быў у 1993 годзе. Палац яна не наведвала, таму што тады ў ім быў санаторый", - удакладніў Яшчанка.
Эльжбета Радзівіл таксама дала некалькі саветаў падчас рэстаўрацыі Нясвіжскага замка пасля пажару ў пачатку 2000-х.
Радзівілы - магнацкі род Вялікага Княства Літоўскага, прадстаўнікі якога ў XV-XVIII стагоддзях займалі вышэйшыя пасады ў дзяржаве. Ужо да сярэдзіны XVI стагоддзя Радзівілам у Беларусі належалі Давыд-Гарадок, Клецк, Койданава, Копысь, Мір, Нясвіж, Чарнаўчыцы, Шчучын і мноства іншых населеных пунктаў.
Чытайце таксама:
Як адпачывалі і жартавалі князі Радзівілы
Мікалай Радзівіл Чорны: 10 цікавых фактаў
Прах Магдалены Радзівіл пахаваны ў Мінску: здейснілася яе апошняя воля