МІНСК, 22 ліп – Sputnik. Канцлер Германіі Ангела Меркель напярэдадні абмеркавала з прэзідэнтам РФ Уладзімірам Пуціным выкананне Мінскіх пагадненняў, а таксама транзіт газу праз Украіну і трубаправод "Паўночны паток-2", заявілі ў прэс-службе ўрада ФРГ.
"Канцлер Ангела Меркель перагаварыла па тэлефоне з прэзідэнтам Расіі Уладзімірам Пуціным. Тэлефонны званок тычыўся выканання Мінскіх пагадненняў аб мірным урэгуляванні канфлікту на ўсходзе Украіны. Абмяркоўваліся таксама такія энергетычныя пытанні, як транзіт газу праз Украіну і трубаправод "Паўночны паток - 2". Таксама былі ўзняты двухбаковыя пытанні", - гаворыцца ў паведамленні.
У Крамлі ў сваю чаргу адзначылі, што падчас тэлефоннай размовы, якая адбылася па ініцыятыве нямецкага боку, лідары дзвюх краін задаволены надыходзячым да завяршэння будаўніцтвам газаправода.
"Прэзідэнт Расіі адзначыў паслядоўную прыхільнасць германскага боку рэалізацыі дадзенага праекта, які носіць выключна камерцыйны характар і накіраваны на ўмацаванне энергабяспекі Германіі і Еўрасаюза", - гаворыцца ў паведамленні Крамля.
"У якасці асобнай тэмы прэзідэнт Расіі і федэральны канцлер ФРГ закранулі магчымасць падаўжэння дамовы паміж "Газпромам" і "Нафтагазам Украіны" аб транспарціроўцы газу праз украінскую тэрыторыю і пасля 2024 года", - дадалі ў прэс-службе Крамля.
У сераду намеснік дзяржсакратара ЗША па палітычных справах Вікторыя Нуланд заявіла аб тым, што Вашынгтон і Берлін дамовіліся па "Паўночным патоку - 2". Паводле яе слоў, ФРГ, у прыватнасці, будзе дамагацца выпрацоўкі агульнаеўрапейскіх санкцый у дачыненні да Масквы ў выпадку выкарыстання энергарэсурсаў для эканамічнага і палітычнага ціску на Кіеў.
Таксама Нуланд запэўніла, што ФРГ гатова падтрымаць працяг дамовы пра транзіт энерганосьбітаў паміж Расіяй і Украінай, які заканчваецца ў 2024 годзе.
Санкцыі не спрацавалі
Раней ЗША адмовіліся ад санкцый у дачыненні да еўрапейскіх удзельнікаў праекта, напрыклад, аператара газаправода Nord Stream 2 AG - прадпрыемства "Газпрома" ў Швейцарыі. У траўні новаабраны кіраўнік Белага дома Джо Байдэн растлумачыў, што гэта зроблена для далейшага стратэгічнага супрацоўніцтва з ЕС.
20 ліпеня Дзярждэпартамэнт ЗША прызнаў, што абмежаванні не перашкодзілі будаўніцтву "Паўночнага патоку-2".
А сенатар ад Рэспубліканскай партыі Тэд Круз назваў дамоўленасці геапалітычнай перамогай Уладзіміра Пуціна "на пакаленне наперад і катастрофай для ЗША".
Чытайце таксама:
Укладка першай ніткі "Паўночнага патоку - 2" завершана - Пуцін
Меркель пракаментавала будаўніцтва "Паўночнага патоку - 2"
"Лухта несусветная": дэпутат ФРГ аб умове Кіева па "Паўночным патоку - 2"