МІНСК, 1 кас – Sputnik. Сезон загоннага палявання на капытных адкрыўся ў Беларусі ў пятніцу, ён будзе доўжыцца да 31 снежня, паведамілі ў Беларускім таварыстве паляўнічых і рыбаловаў.
Паляваць у гэты перыяд можна будзе ў светлы час сутак ружэйным загонам і з сабакамі. Таксама дазволена здабываць дзічыну з засады і з падыходу.
У кастрычніку можна здабываць ваўка, дзіка, варону шэрую, лісіцу, янотападобнага сабаку, выдру, бабра. Сярод птушак паляванне дазволена на сароку, чаплю шэрую і чаплю белую вялікую, баклана, вальдшнэпа, вадаплаўную і балотную дзічыну, голуба шызага, вехіра, фазана, перапёлку, курапатку шэрую, рабчыка.
Таксама з 2 кастрычніка адкрываецца сезон палявання на зайцоў.
"З 2 кастрычніка адкрываецца сезон палявання на зайца-беляка і зайца-русака. Паляваць можна ў светлы час сутак на жывёл любога полу і ўзросту", - сказалі ў БТПР.
Пры гэтым пакуль ёсць абмежаванні, якія будуць дзейнічаць да першай суботы лістапада, гэта значыць да 6-га чысла: ружэйным спосабам можна паляваць на зайца толькі з падыходу і толькі з ганчакамі, якія маюць палявы дыплом (па зайцу і (або) лісіцы). З адным такім сабакам на паляванне дазволена адпраўляцца да трох чалавек. У пуцёўках паляўнічых павінны быць запісаны дадзеныя рэгістрацыйнай карткі сабакі.
Дазваляецца здабываць зайцоў з ужываннем гладкаствольнай паляўнічай зброі і патронаў са шротам. Таксама магчымы безружэйны спосаб палявання - з хартамі і лоўчымі птушкамі.