МІНСК, 2 каст - Sputnik. На тэрыторыі Беларусі няма замежных ваенных баз, але калі трэба будзе, то краіна ператворыцца ў адзіную ваенную базу Беларусі і Расіі, заявіў прэзідэнт рэспублікі Аляксандр Лукашэнка ў інтэрв'ю журналісту амерыканскага тэлеканала CNN Мэцью Чэнсу.
Кіраўнік дзяржавы здзівіўся, што журналіст і НАТА нібыта нічога не ведаюць пра вайсковыя базы на тэрыторыі Беларусі, а дзве расійскія, якія існуюць з савецкіх часоў, ён назваў па сутнасці грамадзянскага прызначэння.
Адна з іх прызначана "для ранняга выяўлення пуску ядзерных ракет з вашай тэрыторыі", сказаў Лукашэнка. Другая - для сувязі расійскіх узброеных сілаў са сваім флотам у Атлантычным акіяне.
"Вось і ўсе базы. Там за ўсё, напэўна, 30-40 чалавек служаць. Нашых людзей. Там два-тры афіцэры расіян, астатнія - нашы вайскоўцы. Больш ніякіх баз тут няма", - сказаў прэзідэнт.
Журналіст пацікавіўся, ці не ператворыцца краіна ў заходні фарпост Расіі. Лукашэнка назваў такія развагі глупствам і задаў сустрэчнае пытанне:
"Калі вы так баіцеся, што Беларусь можа ператварыцца ў заходні фарпост Расіі, тады навошта вы гэтую дурную, бязмозглую праводзіце палітыку? Навошта вы нас робіце фарпостам Расіі?"
Кіраўнік дзяржавы заўважыў, што па сутнасці Беларусь ужо даўно з'яўляецца фарпостам Саюзнай дзяржавы Беларусі і Расіі, а на заходнім напрамку фактычна створана адзіная ўзброеная групоўка, асновай якой з'яўляецца беларуская армія. У выпадку неабходнасці фарпост будзе створаны на працягу месяца.
"І ў выпадку канфлікту, мы гэта не ўтойваем, нас уся заходняя частка Узброеных Сіл Расіі будзе падтрымліваць. Я вас не пугаю. Я проста вам нагадваю тое, пра што мы ўвесь час кажам", - сказаў Аляксандр Лукашэнка.