МІНСК, 22 кас - Sputnik. Прэзідэнт Беларусі Аляксандр Лукашэнка патрабуе падтрымліваць рост даходаў насельніцтва, не дапусціўшы рост коштаў. Пра гэта ён заявіў на нарадзе з кіраўніцтвам Савета міністраў у пятніцу.
Сёння ў Палацы Незалежнасці разглядаюць шэраг актуальных пытанняў: барацьба з каронавірусам, стымуляванне выкарыстання электрамабіляў, гатоўнасць АПК да асенне-зімовага перыяду.
"Мы падыходзім да зімовага перыяду. І акрамя супрацьэпідэмічных пытанняў стаіць задача стрымлівання росту коштаў, каб яны не перавышалі прымальны для насельніцтва ўзровень", цытуе кіраўніка дзяржавы выданне "СБ. Беларусь сегодня".
Паводле слоў беларускага лідэра, тэма коштаў на спажывецкія тавары і паслугі заўсёды хвалявала насельніцтва.
"Ёсць тэма, і вельмі важная, і яна правільная, якую ўздымаюць людзі, - суадносіны росту цэн і даходаў насельніцтва. Людзям усё роўна, якія будуць кошты ў краме. Былі б грошы ў кішэні, каб па гэтых цэнах набыць тавар. І вось гэтую прапорцыю і баланс трэба падтрымліваць у што б там ні стала", - падкрэсліў кіраўнік дзяржавы.
Растлумачыць, як фарміруецца кошт
На думку Лукашэнкі, трэба больш актыўна тлумачыць людзям, што цэны на тавары і паслугі ўзаемазвязаны з фінансавым станам прадпрыемстваў, ад якога ў сваю чаргу залежыць дастатак работнікаў.
"Рост цэнаў на нейкія тавары - гэта перш за ўсё дабрабыт тых калектываў, якія вырабляюць гэтыя тавары", - звярнуў увагу беларускі лідэр.
"Калі на трактар расце цана, то больш грошай атрымлівае трактарны завод, працоўны калектыў. Але сялянам, прабачце мяне, да ліхтара, што там лепш жыве працоўны калектыў МТЗ. Яны заўсёды скардзяцца, што расце кошт на трактар", - цытуе кіраўніка дзяржавы БелТА .
Беларускі лідэр закрануў таксама цэны на прадукты харчавання. "Ці ж на злобу дня - рост коштаў на прадукты харчавання. Гараджан не цікавіць, і яны не радуюцца ад таго, што, калі кошты на бульбу ці яшчэ штосьці выраслі, то сяляне атрымалі хоць невялікае прыбаўленне да сваёй заработнай платы, а калгасы і саўгасы, па-старому кажучы, атрымалі дадатковы заробак. Гараджан гэта не цікавіць, і людзі так не думаюць. Трэба людзям гэта тлумачыць", - падкрэсліў ён.