МІНСК, 1 ліс — Sputnik. Фінал турніру Кубка Білі Джын Кінг (раней - Кубак Федэрацыі) стартуе ў Празе з удзелам 12 лепшых жаночых зборных свету.
У першым матчы беларускі будуць сапернічаць з камандай Бельгіі - гульня пройдзе 1 лістапада і пачнецца ў 12:30 па мінскім часе.
Другі паядынак са зборнай Аўстраліі прызначаны на 4 лістапада. Бельгійкі і аўстралійкі сустрэнуцца паміж сабой 2 лістапада, а пераможца групавога этапа адправіцца ў паўфінал. Там ён згуляе або з Чэхіяй, або з Германіяй, або са Швейцарыяй.
Склад беларускай зборнай на гэтым турніры няпоўны: не выступяць Арына Сабаленка і Вікторыя Азаранка. Таксама камандзе не дапаможа Вольга Гаварцова. Застаецца спадзявацца на Аляксандру Сасновіч, Юлію Гатоўка, Ірыну Шымановіч і Лідзію Марозаву.
Кубак Білі Джын Кінг - найбуйнейшыя міжнародныя камандныя спаборніцтвы ў жаночым тэнісе. Да мінулага года называліся Кубак Федэрацыі, але потым былі перайменаваны ў гонар легендарнай амерыканскай тэнісісткі.
Беларуская зборная гуляе на турніры з 1994 года, найлепшае дасягненне - другое месца ў 2017 годзе (турнір прайшоў у Мінску). У 2020 годзе спаборніцтвы не адбыліся з-за пандэміі каронавіруса.