МІНСК, 2 сне - Sputnik. Прэзідэнт Беларусі Аляксандр Лукашэнка заявіў аб зацікаўленасці Беларусі ў супрацоўніцтве з Астраханскай вобласцю Расіі, перадае карэспандэнт Sputnik.
Губернатар Астраханскай вобласці Ігар Бабушкін прыехаў у чацвер з візітам у Мінск і сустрэўся з кіраўніком дзяржавы. Прэзідэнт на сустрэчы з губернатарам заявіў, што Беларусь гатова да ўзаемадзеяння з расійскім рэгіёнам.
“Блізкіх ці далёкіх губерняў Расіі (для Беларусі – Sputnik) няма. Таму я яшчэ раз хачу падкрэсліць, што калі Браншчына, Смаленшчына ці Пскоўшчына побач, гэта не значыць, што яны нам важнейшыя, а Астраханская вобласць другарадная. Наадварот – чым далей, тым, мусіць, важней", - сказаў Лукашэнка, звяртаючыся да губернатара.
Паводле яго слоў, важна, каб Беларусь і Астраханская вобласць маглі супрацоўнічаць адна з адной.
"Вы ведаеце нашы магчымасці, вы вывучылі, чым мы можам быць карысныя для вашай вобласці, мы вельмі добра ведаем вашы магчымасці, і гэта ўсё заснавана на добрым падмурку - нашых добрых беларуска-расійскіх адносінах", - сказаў кіраўнік дзяржавы.
Ён адзначыў, што Беларусь і Расія пачалі наладжваць узаемаадносіны ў 1990-я гады, і размовы аб тым, што апошнім часам краіны актывізавалі супрацоўніцтва з-за санкцый Захаду, няпраўда.
Ад збожжа да рыбы і тэхнікі
Кіраўнік дзяржавы таксама адзначыў, што ў Беларусі і Астраханскай вобласці ёсць напрамкі для супрацоўніцтва.
"Можам мы дапамагчы нечым у сельскай гаспадарцы - калі ласка, апошняе зерне аддадзім суперэлітнае, каб у вас было добра. Можаце вы нам бахчавымі культурамі дапамагчы, падказаць у нечым, будзем вам удзячныя", - сказаў Лукашэнка, звяртаючыся да губернатара.
У сваю чаргу Бабушкін адзначыў зацікаўленасць рэгіёну ў супрацоўніцтве з Беларуссю, адзначыўшы, што ў вобласці шмат беларускай сельгастэхнікі.
Губернатар нагадаў, што Астраханская вобласць не толькі з'яўляецца "ўсерасійскім агародам", плодаагароднінная прадукцыя з рэгіёну карыстаецца попытам і ў Беларусі. Пры гэтым ён падкрэсліў, што Астраханская вобласць гатова пашырыць пастаўкі сваёй знакамітай рыбнай прадукцыі.
"Мы вельмі рады, што наша розная рыбная прадукцыя карыстаецца папулярнасцю і запатрабаванасцю ў Беларусі. І тое, чым мы сёння можам ганарыцца, пачынаючы з асетраў і заканчваючы знакамітай астраханскай воблай, гатовы да пашырэння паставак", - сказаў губернатар, звяртаючыся да Лукашэнкі.
Ён таксама згадаў планы адкрыць у Астрахані гандлёва-сэрвісны цэнтр Мінскага трактарнага завода.