ГРОДНА, 3 сне – Sputnik, Іна Грышук. Падарожжа з Гродна ў Маскву зараз стане прасцей і хутчэй - дабрацца ў расійскую сталіцу можна не толькі цягніком, але і прамым авіярэйсам з мясцовага аэрапорта. Першы рэйс запланаваны на 4 снежня, далей - двойчы на тыдзень.
Выконваць прамыя авіяпералёты па маршруце Масква - Гродна - Масква будзе расійская авіякампанія Norwind. Пералёты плануюць выконваць самалётам Embraer 190, умяшчальнасць якога каля 100 месцаў.
Першапачаткова планавалася, што будзе тры рэйсы ў тыдзень, але за некалькі дзён да першага рэйса кампанія-перавозчык унесла змены ў расклад, скараціўшы іх да двух разоў на тыдзень - па суботах і панядзелках. Аэрапорт прылёту ў Маскве - Шарамеццева.
Згодна з раскладам, працягласць палёту складзе 1 гадзіну 50 хвілін. Вылет з Масквы - у 00:55, прылёт у Гродна - у 2:45. Вылет з Гродна - у 4:00, час прылёту ў Маскву - 5:50.
Білеты на новы авіярэйс рэйс Гродна - Масква супастаўныя з паездкай у Маскву на цягніку. Па стане на 3 снежня самы танны білет, у які не ўключаны багаж, каштуе каля 135 рублёў, з багажом - каля 190 рублёў, білет катэгорыі прэміум класа - з багажом і магчымасцю выбраць месца ў салоне - 250 рублёў. Кошт квітка на цягнік Гродна-Масква ў плацкарце - ад 105 да 116 рублёў, у купэ - 220 рублёў.
Рэгулярныя рэйсы з Гродна ў Маскву выконваліся больш за дзесяць гадоў таму. Апошні такі рэйс быў ажыццёўлены ў 2010 годзе, іх выконвала расійская авіякампанія "Атлант Саюз". Пасля гэтага з гродзенскага аэрапорта выконваліся авіяпалеты ў Калінінград, а падчас пандэміі - прымалі толькі чартарныя рэйсы.
Чытайце таксама:
Расійская авіякампанія абвясціла аб рэйсах Гомель - Масква
"Белавія" адмяняе палёты ва Уфу
Авіякампанія "Азімут" будзе лятаць з Калугі ў Мінск