Беларусы пачалі скупляць білеты на зімовыя святы. Якія напрамкі аказаліся самымі папулярнымі ў шорт-лісце нашых суайчыннікаў, Sputnik расказалі перавозчыкі і туркампаніі.
Горныя лыжы, санаторыі і экскурсія па Мінску
У "Цэнтркурорце" - кампаніі, якая прадае туры і па Беларусі, і ў бліжэйшае замежжа - адзначаюць: перад святамі вызначыліся тры топ-месцы, куды людзі купляюць пуцёўкі.
"Гэта традыцыйна, але ў гэтым годзе яшчэ лепш - Новы год у санаторыях. Прадаецца вельмі добра. І тут попыт перавышае прапанову", - распавядае намеснік дырэктара кампаніі Аляксей Стрэльчанка.
Другая навагодняя турыстычная праграма - галоўная ёлка краіны ў Палацы рэспублікі. Па словах прадстаўніка дзяржаўнай туркампаніі, у асноўным білеты скупляюць жыхары рэгіёнаў.
"Сфарміравалі туры, якія ўключаюць экскурсію па Мінску, святочнае мерапрыемства і абед. Вельмі высокі попыт з райцэнтраў. Рэалізавалі квоту ў 1000 білетаў - гэта каля 20 аўтобусаў", - канстатуе субяседнік.
Паводле яго слоў, у тройцы лідэраў - гарналыжныя туры ў Сочы. Многія беларусы браніруюць пуцёўкі ў санаторый "Беларусь" у Краснай Паляне.
"З улікам таго, што ёсць прамыя самалёты ў Сочы, турпакет даволі танны. У нас купляюць нават расіяне", – адзначае Стрэльчанка.
А за мяжу?
Традыцыйна беларусы лятаюць на Новы Год чартэрнымі рэйсамі ў Егіпет. Што да рэгулярных напрамкаў, у беларусаў у перыяд зімовых свят карыстаюцца папулярнасцю Грузія, ААЭ і Расія, а менавіта Масква і Санкт-Пецярбург, расказваюць у "Белавія".
Таксама беларускія самалёты зараз лятаюць у Арменію, Казахстан, Азербайджан, Турцыю, Ізраіль і Узбекістан, а з расійскіх гарадоў - яшчэ ў Сочы, Краснадар, Казань і Екацярынбург.
З цягнікоў выбар вельмі сціплы - Расія. З напрамкаў - Масква (цягнікі ходзяць з Мінска і ўсіх абласных цэнтраў штодня), Санкт-Пецярбург, Адлер і з нядаўняга часу - Мурманск. "Палярны экспрэс" стартаваў з Мінска раніцай у сераду і ў сталіцу Арктыкі прыбудзе раніцай у пятніцу. Каб паглядзець на паўночнае ззянне і адчуць сапраўдную зіму, у дарозе трэба правесці амаль двое сутак - чым не нагода для навагодняга тура?
Аўтобусныя падарожжы пад Новы год аказаліся самымі незапатрабаванымі. Справа ў закрыцці межаў, падкрэслівае дырэктар папулярнага беларускага перавозчыка групы кампаній Ecolines.
"Не магу сказаць, што попыт вырас у параўнанні з лістападам або кастрычнікам. Напрамкі, якія былі, захаваліся", - коратка канстатуе сітуацыю Павел Куцэнка.
Аўтобусы кампаніі зараз ездзяць у Расію, Польшчу, Украіну, Літву, Латвію, Эстонію і Германію. Тым часам, дзяржаўны перавозчык "Мінсктранс" адмяніў рэйсы ў пераднавагодні вечар з Мінска ў Рыгу, а таксама з Рыгі ў Мінск. Не адбудуцца і рэйсы ў Каўнас.