МІНСК, 6 сту - Sputnik. Літва па-ранейшаму пакідае ўзмоцнены рэжым аховы мяжы з Беларуссю, пра гэта журналістам паведаміў начальнік Службы аховы дзяржмяжы пры МУС Літвы генерал Рустамас Любаевас.
Паводле ацэнак генерала, плынь нелегальных мігрантаў, якія спрабуюць перасекчы беларуска-літоўскую мяжу, апошнім часам значна знізілася, тым не менш патэнцыйная пагроза ўсё роўна існуе.
Як адзначыў кіраўнікі пагранічнага ведамства, на беларускай тэрыторыі да гэтага часу знаходзіцца каля дзвюх тысяч нелегалаў з краін Азіі і Афрыкі.
"Звестак аб тым, колькі з іх працягваюць заставацца каля мяжы з Літвой, у нас няма", - заўважыў Любаевас.
Паводле яго слоў, менавіта таму важна захаваць рэжым надзвычайнага становішча, які "дае нам больш магчымасцей для рэагавання на пагрозы нелегальнай міграцыі, але і пры яго адмене будзе дастаткова інструментаў для надзейнага забеспячэння аховы мяжы".
Надзвычайнае становішча
Надзвычайнае становішча на граніцы з Беларуссю было ўведзена 10 лістапада 2021 года. Тэрмін яго дзеяння заканчваецца 15 студзеня.
4 студзеня прэзідэнт Літвы Гітанас Наўседа прапанаваў адмяніць рэжым надзвычайнага здарэння на мяжы з Беларуссю.
"Я мяркую, што ў такой сітуацыі, якая склалася цяпер, было б мэтазгодна абмяркоўваць адмену надзвычайнага становішча, бо гэта моцны інструмент, які мы павінны выкарыстоўваць у асаблівых абставінах", - сказаў Науседа.
На яго думку, праблема з мігрантамі вырашана, а калі сітуацыя зноў ускладніцца, дык рэжым надзвычайнай сітуацыі зноў можна будзе ўвесці.
Міграцыйны крызіс
Міграцыйны крызіс рэзка абвастрыўся ў лістападзе, калі бежанцы з Ірака, Ірана, Сірыі і іншых краін Блізкага Усходу прыйшлі да пункта пропуску "Брузгі", каля якога разбілі стыхійны палатачны лагер.
Мігранты спрабавалі прайсці на тэрыторыю Польшчы, пасля чаго польскі бок ужыў вадамёты, слёзатачывы газ і святлошумавыя гранаты.
З 16 па 18 лістапада мігранты перабіраліся ў арганізаваны беларускім бокам крызісны цэнтр у гандлёва-лагістычны цэнтр, размешчаны недалёка ад пункта пропуску "Брузгі".
Большая частка мігрантаў ужо пакінула ТЛЦ і паляцела на радзіму.
Некаторыя з іх па-ранейшаму спрабуюць патрапіць на тэрыторыю краін Еўрапейскага саюза ў пошуках лепшых умоў жыцця, уз'яднання са сваякамі.
Чытайце таксама:
Прэзідэнт Літвы прапанаваў адмяніць надзвычайнае становішча на мяжы з Беларуссю
Літва дэпартавала ў Ірак амаль 100 нелегальных мігрантаў
Расійская спявачка Зара прывезла дапамогу для бежанцаў у ТЛЦ "Брузгі"