МІНСК, 10 сту - Sputnik. Мінгарвыканкам прыняў рашэнне аб тым, што на працягу бліжэйшага месяца павінны быць завершаны работы і запушчаны рух па новым пуцеправодзе на Нямізе, паведаміў старшыня Мінгарвыканкама Уладзімір Кухараў.
"Цяпер галоўная задача - забяспечыць разборку канструкцый. Думаю, на працягу сутак мы завершым. Цяпер праектная група рыхтуе рашэнні па далейшых работах. Вечарам яны будуць дакладваць на штабе", - цытуе Кухарава агенцтва БелТА.
Паводле яго слоў, будзе складзены графік работ, крокі і тэрміны для канкрэтных арганізацый, якія будуць удзельнічаць у працэсе аднаўлення.
Таксама мэр агучыў, хто з праекціроўшчыкаў займаецца падрыхтоўкай будаўнічых рашэнняў па мосце, - гэта праектная арганізацыя "Інжпраект".
Кухараў таксама паведаміў, што праект моста будуць ацэньваць у першую чаргу з пункту гледжання надзейнасці і даўгавечнасці канструкцый і функцыянальнасці складанай транспартнай развязкі ў цэнтры горада.
Мэр таксама агучыў тэрміны ўзвядзення новага маста. Паводле яго слоў, Мінгарвыканкам разлічвае, што на працягу месяца будуць завершаны ўсе будаўнічыя работы і запушчаны рух як па новым пуцеправодзе, так і пад ім.
Брыгады на аб'екце працуюць кругласутачна, паведаміў мэр.
Нагадаем, СК Беларусі сёння паведаміў аб узбуджэнні дзвюх крымінальных спраў па факце падзення моста.
Адна справа ўзбуджаная па ч. 1 арт. 305 (Парушэнне праектаў, абавязковых для захавання патрабаванняў тэхнічных нарматыўных прававых актаў пры вытворчасці будаўніча-мантажных работ), а другое - па ч. 2 арт. 428 (службовая халатнасць) Крымінальнага кодэкса.
Пакуль няма інфармацыі пра тое, ці ёсць падазраваныя па дадзеных крымінальных справах, каго выклікалі на допыты і якую канкрэтна дакументацыю следчыя забралі.
Сёння стала вядома, што матэрыялы даследчай праверкі УСК па Мінску перадаў у Цэнтральны апарат СК, які і ўзбудзіў крымінальную справу. Санкцыя артыкула за службовую халатнасць прадугледжвае ў тым ліку пазбаўленне свабоды.
У ноч з 7 на 8 студзеня ў Мінску па праспекце Пераможцаў праз вуліцу Няміга абрынулася частка пешаходнага моста. Па шчаслівай выпадковасці ніхто не пацярпеў. У Мінгарвыканкаме назвалі папярэднюю версію здарэння: рух метро і перапады тэмператур.
На гэты момант з-за абвальвання перакрыты рух пешаходаў і транспарту ў непасрэднай блізіне каля маста.
Чытайце таксама:
СК узбудзіў крымінальныя справы па факце абрушэння моста ў Мінску
У ручным рэжыме: у Мінску абяцаюць наладзіць рух з-за маста, які абваліўся
На работу па новым маршруце: як будзе хадзіць транспарт з-за абвалу маста