МІНСК, 14 сту - Sputnik. Расія выступае за тое, каб пытанні па гарантыях бяспекі з ЗША і НАТА вырашаліся на аснове балансу інтарэсаў, заявіў падчас прэс-канферэнцыі ў пятніцу кіраўнік МЗС РФ Сяргей Лаўроў.
Раней расійскі бок прадаставіў праекты дагавораў з партнёрамі ў Вашынгтоне і Бруселі, якія закліканы прадаставіць гарантыі бяспекі. Ключавым патрабаваннем з'яўляецца адмова ад пашырэння Паўночнаатлантычнага альянсу на ўсход і стварэння вайсковай інфраструктуры НАТА каля межаў РФ.
Пашырэнне НАТА і плацдармы
"Пазіцыя Расіі, якая была прадстаўлена амерыканцам і натаўцам, заснавана менавіта на балансе інтарэсаў. Гэтыя дакументы нацэлены на гарантаванне бяспекі ў Еўропе ў цэлым, кожнай краіны, уключаючы РФ", - сказаў расійскі міністр.
На яго думку, пазіцыя амерыканскага боку і іх сатэлітаў заключаецца ў імкненні ўмацаваць уласнае дамінаванне на еўрапейскім кантыненце.
"Яны хочуць стварыць плацдармы вакол РФ, ваенныя плацдармы, хочуць пастаянна ствараць раздражняльнікі для нас, вакол нашых граніц", - канстатаваў Сяргей Лаўроў.
Пасля чаго нагадаў, што дзеянні заходніх краін з'яўляюцца нічым іншым, як парушэннем Хартыі еўрапейскай бяспекі, прынятай у Стамбуле ў 1999 годзе.
Санкцыйная дубінка
Адказваючы на пытанне, якімі будуць дзеянні Масквы ў выпадку адмовы ЗША гарантаваць непашырэнне НАТА, кіраўнік МЗС РФ канстатаваў, што не можа "нічога дадаць да таго, што сказаў прэзідэнт Пуцін".
"Адказ можа быць самым розным, гэта залежыць ад тых прапаноў, якія зробяць яму, прэзідэнту Расіі, нашы ваенныя эксперты. Таму гадаць цяпер на кававай гушчы (не варта)", - адзначыў ён.
Сяргей Лаўроў дадаў, што толькі заходнія калегі, перш за ўсё амерыканцы, схільныя, не чакаючы развіцця падзей, адразу хапацца за "санкцыйную дубінку".
Пры гэтым ён запэўніў, што Расія гатова да любога варыянта развіцця падзей у эканамічнай сферы. "У нас калі і былі нейкія ілюзіі, то за апошнія сем гадоў гэтыя ілюзіі расталі поўнасцю", - адзначыў ён.
"Усе механізмы эканамічных сувязей, якія залежаць ад кантралюемых захадам структур, яны, вядома, змяшчаюць рызыкі. Мы гэтых рызык ужо паслядоўна і хутка пазбаўляемся. У тым ліку і перш за ўсё ў высокатэхналагічных галінах", - звярнуў увагу расійскі міністр.
Тонкая чырвоная лінія
Каментуючы верагоднасць уступлення Украіны ў Паўночнаатлантычны альянс, ён падкрэсліў, што для РФ непрымальна набліжэнне блока да расійскіх межаў.
"Нават калі Украіна застаецца па-за НАТА, там магчымы двухбаковыя дамоўленасці з амерыканцамі, англічанамі, з іншымі заходнімі краінамі, якія там ствараюць ваенныя аб'екты, базы на Азоўскім моры", - сказаў Сяргей Лаўроў.
Паводле яго слоў, "гэта таксама непрымальна, таму што размяшчэнне на тэрыторыі нашых суседзяў, у дадзеным выпадку Украіны, ударных узбраенняў, якія будуць уяўляць пагрозу для РФ, - гэта яшчэ адна чырвоная лінія".
Прамая пагроза Расіі
Пры гэтым кіраўнік МЗС РФ канстатаваў, што на ўкраінскай тэрыторыі ўжо знаходзяцца замежныя вайскоўцы. У цяперашні час яны вылічаюцца не тысячамі, але некалькі сотняў амерыканцаў і брытанцаў прысутнічае.
"Мы выдатна разумеем, што ўсё, што робіць Захад у плане напампоўвання гэтай улады (афіцыйнага Кіева - Sputnik) зброяй, стварае ў яе дадатковую спакусу перайсці да сілавых метадаў вырашэння пытанняў на ўсходзе Украіны. Нам гэта абсалютна непрымальна па зразумелых прычынах", - дадаў ён.
Сяргей Лаўроў звярнуў увагу, што Расія ніколі не дазваляла сабе ні ў публічнай прасторы, ні ў закрытым рэжыме, агучваць пагрозы ўкраінскаму народу.
"А спадары Зяленскі (прэзідэнт Украіны - Sputnik) і яго паплечнікі - яны гэта робяць прама. Я ўжо прыводзіў прыклад, калі Зяленскі запатрабаваў ад рускіх прыбірацца з Украіны. Гэта прамая пагроза", - асабліва адзначыў ён.
Прэцэдэнт АДКБ
Кіраўнік расійскага знешнепалітычнага ведамства таксама выказаў надзею, што міратворчы вопыт АКДБ пасля падзей у Казахстане больш не давядзецца прымяняць.
"Але трэба трымаць порах сухім, калі рускую прыказку прымяніць. Не дай Бог нешта такое ж здарыцца, хаця мы робім усё неабходнае, каб гэта прадухіліць, у тым ліку па лініі адпаведных структур АДКБ", - запэўніў Сяргей Лаўроў.
Пры гэтым ён выказаў упэўненасць, што міратворчы патэнцыял АКДБ даказаў уласную дзеяздольнасць усяму свету. Заходнія краіны са здзіўленнем назіралі за хуткасцю разгортвання міратворчага кантынгенту.
"Падраздзяленні былі накіраваны з усіх краін АДКБ для дапамогі саюзнаму Казахстану па просьбе прэзідэнта гэтай краіны. Яна была, вядома, ацэнена ўсімі па заслугах, я ў гэтым не сумняваюся", - падкрэсліў расійскі міністр.
Адносіны па лініі Масква – Брусель
Адказваючы на пытанне, якім чынам ЕС можа прыняць удзел у перамовах па гарантыях бяспекі, кіраўнік МЗС РФ сказаў, што не ведае, як "Еўрасаюз бачыць свой удзел у перамовах па бяспецы".
Па ягоных словах, ён нават не ўяўляе, ці магчыма арганізаваць канал сувязі з Еўрапейскім саюзам па пытаннях бяспекі без удзелу Злучаных Штатаў ці Паўночнаатлантычнага альянсу.
Сяргей Лаўроў выказаў шкадаванне, што ЕС самастойна разбурыў больш за сем гадоў таму ўсе механізмы, пры дапамозе якіх забяспечваліся практычныя пытанні бяспекі.
"І цяпер, калі мы звярнуліся да ЗША і НАТА, з НАТА ў нас прынамсі яшчэ на паперы хаця б захоўваецца Савет Расія-НАТА, і асноватворны акт ніхто не разбураў. Там, з Еўрасаюзам, усе каналы зносін зацэментаваны нашымі еўрапейскімі калегамі", - канстатаваў ён.
На яго думку, еўрапейскія палітыкі апасаюцца, што інтарэсы ў сферы бяспекі будуць праігнараваны, у чым яны адкрыта прызнаюцца.
Сяргей Лаўроў сказаў, што ў яго адбылася размова з кіраўніком еўрапейскай дыпламатыі Жазэпам Барэлем "на палях" СМЗС АБСЕ ў Стакгольме, дзе "пацвердзілі з абодвух бакоў, што мы адзін аднаго не пазбягаем".
"Але я нагадаў: мяч на баку Еўрасаюза, мы не секлі канцы ў нашых сувязях. Мы размаўлялі з Жазэпам Барэлем летась, гатовы размаўляць дадаткова. Усё залежыць ад таго, наколькі яму дазволяць аднавіць дыялог з РФ і наколькі канструктыўныя будуць тыя пытанні, якія з іх боку могуць быць закрануты", - рэзюмаваў ён.